په ارام سمندر کې یو کوچنی ټاپو د سترې موندنې ځای دی. دا موندنه د نړۍ راتلونکی اقتصاد بدلولی شي. د دې موندنې یو اقتصاد پوه باور دی چې دا زېرمه «د لوبې بدلوونکې ده». کومو څېړونکو چې په دې موندنه کې مرسته کړې؛ د دغه کشف پوتانشیل فوقالعاده ګڼي.
په دې سیمه کې یوه خټینه غونډۍ موندل شوې چې ۱۶ میلیونه ټنه اټکل شوې ده. د دغې خټینې غونډۍ د ننه ګران بیه او ناویات معدني توکي موجود دي. په دغو ناویاتو معدني توکیو کې هغه کمپيدا مواد شته چې په لېرې واټن وېشتونکیو توغندیو، تیلیفونونو، د رادار په دستګاوو او ترکیبي لېږد وسایلو کې ترې کار اخیستل کېږي. د بېلګې په توګه اېتریم چې له دغه فلزه د حساسو او پياوړیو کمرو په لېنزونو او ځېرکو تیلیفونونو په مخ پاڼو کې کارول کېږي.
د هغې څېړنې پر بنسټ چې جاپانیو څېړونکیو خپره کړې، راغلي دغه موندل شوې خټینه غونډۍ د مینامیتوري ټاپو ته څېرمه د چاپان ساحل په ۱۲۰۰ کیلومترۍ کې ځای لري.
په څېړنه کې د بېلګې په توګه راخیستل شوي چې د دغه خټینې غونډۍ دننه اېتریم د ۷۸۰ کلونو، اروپيم ( ناویات کیمیاوي عنصر دی چې د رنګه تلوېزیونونو په جوړولو کې ترې ګټنه کېږي) د ۶۲۰ کلونو، تربیوم (بل یو ناویات فلز دی) د ۷۳۰ کلونو او دیسپروزیم (سپینوزرو ته ورته ناویات فلز دی) د ۷۳۰ کلونو لهپاره د ټولې نړۍ اړتیاوې په دې برخو کې پوره کوي.
دغه نوې موندنه یوه ستر لاسته راوړنه ده او د ناویاتو معدني توکیو د جدي اړتیاوو ته په کتو دغه زېرمه زښته ارزښتمنه ده.
اوسمهال چین د ناویاتو توکیو ستره سرچینه یانې ۹۵ سلنه په واک کې لري. له همدې کبله جاپان او نور هېوادونه د دغو توکیو لاسته راوړو په خاطر په چین ډډه لګوي؛ خو دا ځل جاپان تازه موندل شوي ناویات توکي په خپل واک کې لري.
