د بهرنیو چارو وزارت سرپرست محمدحنیف اتمر وايي، تر راتلونکې اوونۍ پورې به د ۴۰۰ طالب بندیانو د خوشې کولو بهير بشپړ او ډېر ژر به بينالافغاني مذاکرات پيل شي.
اتمر دا څرګندونې تېره ورځ د افغانستان د سولې او جګړې مطالعاتو انستیتیوت کې د وینا پرمهال وکړې.
د نوموړي په وینا له دې کسانو سره به په ټوليزه توګه د ازادو شویو طالب بندیانو شمېر ۵۶۰۰ کسانو ته ورسېږي.
د بهرنیو چارو سرپرست وزیر له طالبانو وغوښتل چې پر خپلو ژمنو عمل وکړي او اجازه دې ور نه کړي چې خوشې شوي بندیان يو ځل بيا د جګړې ډګر ته لاړ شي.
نوموړي زياته کړه چې د بينالافغاني مذاکراتو د پيل مخکې چې کوم خنډونه وو، ټول له منځه تللي او خبرو کولو ته فرصت برابر شوی دی.
دا په داسې حال کې ده چې تېره ورځ د سولې د عالي شورا رييس عبدالله عبدالله هم وويل چې په نسبي باور ويلای شي راتلونکې اوونۍ بينالافغاني مذاکرات پيل شي.
ټاکل شوې د بينالافغاني مذاکراتو لومړی پړاو د قطر په دوحه کې پيل شي.
