د اتلتیک بیلبائو فوټبال لوبډله تېره شپه (دوشنبه) د بارسلونا فوټبال لوبډلې سره د لوبې په ډګر کې د یو پر یو ګول د مساوي والي له امله د هسپانیې سوپر کپ کټونکې شوه.
د بارسلونا لوبډلې، چې د (رفت) په مرحله کې له بیلبائو لوبډلې نه ۴ پر صفر ماتې خوړلې وه؛ د (برګشت) په مرحله کې ټول کوښښ دا و، چې لوبه د دوی په ګټه تمامه شي او توپ تر اخره بیلبائو لوبډلې ته پرېنږدي.
د بیلبائو پر لوبډلې له پرلپسې حملو وروسته د بارسلونا لوبډلې د لوبې په ۴۴مه دقیقه کې مسي د لويي سوارز په پاس باندې وکولی شول، چې د بیلبائو لوبډلې د ګول د دروازې قفل مات کړي.
د بارسلونا لوبډلې د لوبې په اوږدو کې یو په بل پسې د ګول وهلو موکې له لاسه ورکړې، تر دې چې په ۵۸ دقیقه کې د (پيکی) لوبغاړي له میدانه خارجېدلو سره یې بیخي د کپ د ګټلو هیلې اوبو یوړې.
د لوبې په وروستیو ۱۵ دقیقو کې اتیز ادوریز د بیلبائو لوبډلې لوبغاړي له موکې نه په استفادې وکولی شول، چې پر مقابلې لوبډلې یو ګول ووهي او خپله لوبډله له بارسلونا لوبډلې سره د یو پر یو مساوي کړي. دا هغه ګول و، چې د بارسلونا لوبډلې تمې یې د کپ له ګټلو نه پرې کړې.
د یادولو ده، چې بیلبائو لوبډلې له ۳۱ کلونو وروسته د هسپانیا سوپر کپ اتلولي وګټله.
