تخار ولایتی نینگ دشت‌قلعه تومنیده جایلشگن آی‌خانم بندری کمیساری کوچلریدن اونلرچه‌سی بیش کوندن بویان طالبان گروهی نینگ قمراویده قالگن. رقم‌لری کمیده 40 کیشی بولگن اوشبو کوچلرنینگ ایتیشیچه، کون اوتیشی بیلن طالبان گروهی نینگ قمراوی تار بولماقده.
چیگره کوچلریدن بیری عوض‌محمدنینگ ایتیشیچه، آغیر و یینگیل قوراللر بیلن جهازلنگن کمیده 200 جنگری طالب بیش کوندن بویان دشت‌قلعه‌ده جایلشگن آی‌خانم بندری نی قمراوگه آلگن و قمراوده قالگن چیگره کوچلری ییگولیک آذیق-آوقت و مهمات کم‌لیگی گه روپه‌ره بولگن‌لر.
مذکور عسکرنینگ ایتیشیچه، اوشبو تومن گه یوباریلگن یاردمچی کوچلر حاضرگچه بو توغریده هیچ بیر ایش قیلمه‌گن. اونگه کوره، آی‌خانم بندری جایلشگن چیگره کوچلری نینگ یره‌دارلری، بوگون تاجیکستان گه انتقال بیریلگن.
عین حالده، دشت‌قلعه تومنی یشاوچیلریدن بیرقطاری، مذکور تومن بازاری طالبان گروهی تامانیدن قمراوگه آلینگنیدن خبر بیریب ایتیشیچه، حربی و پولیس کوچلری شامل دشت‌قلعه تومنی گه کیلگن یاردمچی کوچلر پولیس قومندانلیگی و سوونی کوزه‌تووچی اداره ده جایلشگن‌لر و بو کوچلرنینگ عملیاتی هیچ بیر نتیجه بیرمه‌گن.
تخار ولایتی نینگ پولیس قومندانلیگی سرپرستی حشمت مسلم، بو توغریده صحبت بیریش گه حاضر بولمه‌گن. بیراق، تخار حاکمی سوزلاوچیسی جواد هجری نینگ اییتشیچه، دشت‌قلعه تومنیده طالبان گروهی نینگ هجوملری مغلوب ایتیلیب و موجود خواطرلر رفع ایتیلگن.
شونینگدیک، تخار حاکمی سوزلاوچیسی، مذکور تومن گه ینه هم یاردمچی کوچ یوباریلیشی دن خبر بیره‌دی.
طالبان گروهی نینگ الفتح آتلی بهاری عملیاتی باشلنگنیدن سونگ، مذکور گروه تخار ولایتی نینگ دشت‌قلعه تومنیده هجوملرینی شدتلنتیردی؛ اوچ تاماندن اوشبو تومنده بولگن امنیتی کوچلر بیلن اوروشه‌دی و حاضرگچه تورت مرته امنیتی کوچلرنی اوستیگه هجوم قیلگن.
ایتیش کیره‌ک کیم، اوتگن بیش کونده دشت‌قلعه تومنیده یوز بیرگن آتیشمه‌لر جریانیده چمه‌سی 2 مینگ عایله آواره بولگن. آواره بولگن عایله‌لر کیچه-کوندوزلرینی امکانیت‌سیز و باش‌پناه سیز آچیق فضا و دشت‌لرده اوتکزه‌دیلر.
شو توغریده…
