جوزجان ولایتی‌نینگ مرکزی شبرغان شهریده نیچه وقت‌دن بویان آرایشگاه‌لرنی رقمی کوپه‌یگن؛ بیراق بو آرایشگاه‌لرده ساغلیک موضوعی نظرگه آلینمه‌گنی جوزجان یاشلری‌نینگ تنقیدی گه سبب بولگن.
20 یاشیدن بولگن یاش ییگیت نصیرنینگ ایتیشیچه، ایکی آی آلدین سقالی‌نی تراش قیلیش اوچون شهرده‌گی آرایشگاه‌لردن بیری گه بارگن و اوندن سونگ، تیری کسل‌لیگی گه دوچار بولگن و بو کسل‌لیک‌نی دارولش اوچون 50 مینگ افغانی صرفله‌گن؛ لیکن حاضرگچه توزه‌لمه‌گن.
شونینگدیک، جوزجان‌لیک قیزلردن سحر و زرمینه یاشلرنی آره‌سیده تیری کسل‌لیک‌لری کوپه‌یگنیدن خواطر بیلدیره‌دیلر.
اولرگه کوره، ساغلیک موضوعی نظرگه آلینمه‌گنی و بیر آرایش لوازمی‌نی نیچه کیشی گه اورینتیریش تیری کسل‌لیک‌لریگه سبب بولگن.
اولرنینگ کوپه‌یتیریشیچه، بیر آرایش لوازمی‌نی نیچه کیشی گه اورینتیریش خطرلی کسل‌لیک‌لر جمله‌دن ایدزگه سبب بوله‌دی.
شونینگدیک، جوزجان ولایتی‌نینگ ساغلیق‌نی ریاستی باشلیغی حفیظ‌الله جمشیدی‌نینگ ایتیشیچه، مذکور ولایت‌نینگ آرایشگاه‌لریده ساغلیک موضوعی نظرگه آلینمه‌گنی تیری کسل‌لیگی کوپه‌ییشی سبب بولگن. بیراق اونینگ ایتیشیچه، شبرغان شهریده 100-150 آرایشگاه فعالیت قیله‌دی و اولرنی نظارت قیلیش ساغلیق‌نی سقلش ریاستی‌نینگ کوچیدن تشقری دیر.
عین حالده، جوزجان یشاوچیلری، مذکور ولایت‌نینگ ساغلیق‌نی سقلش ریاستی‌دن آرایشگاه‌لر جدی شکلده نظارت ایتیلیشی و تیری کسل‌لیک‌لری آلدی آلینیشی‌نی طلب قیله‌دیلر.
