د بادغیس ولایتي شورا غړی فرید اخيزی وايي، طالبانو پرون د بالامرغاب ولسوالۍ «اکازیو» سیمه کې د ملياردو پر پوستو ډلهییز بریدونه کړيدي.
هغه وویل، دغو بریدونو کې ۱۴ امنیتي ځواکونه وژل شوي او ۱۰ نور ټپیان دي.
د بادغیس والي ویاند جمشید شهابي بالامرغاب ولسوالۍ کې په امنیتي پوستو د طالبانو بریدونه تاییدوي او وايي، نښتو کې د ملياردو ۱۲ سرتېري وژل شوي او ۱۰ نور ټپیان دي.
د هغه په وینا، نښتو کې طالبانو ته هم تلفات اوښتي؛ خو شمېر یې نهدی معلوم.
طالبانو هم د امنیتي ځواکونو تلفات تایید کړيدي.
لهدې سره هممهاله په تخار کې یوه امنیتي سرچینه وايي، طالبانو بېګاه د خواجهغار ولسوالۍ ښار ته نږدې د امنیتي ځواکونو په پوستو بریدونه کړي چې ۴ دولتي سرتېري پهکې وژل شوي او ۵ نور ټپیان دي.
وژل شویو سرتېرو کې یو د ملي امنیت، یو د پولیسو افسر او دوه پولیس شامل دي.
د سرچینې په وینا، طالبانو د خواجهغار ولسوالۍ په امنیې قوماندانۍ هم څو توغندي توغولي دي.
دې سره د تخار والي ویاند جواد هجري هم د طالبانو برید تاییدوي؛ خو د تلفاتو په اړه څه نه وايي.
هغه زیاته کړه، خواجهغار ولسوالۍ ته د امنیتي ځواکونو ملاتړ لهپاره مرستندویه ځواکونه لېږل شوي او اوسمهال سیمه کې جګړه ختمه شوېده.
ورته مطالب:
طالبانو بادغیس کې ۱۷ سرتېري وژلي
د بادغیس د بالامرغاب سقوط او د پوځې کنډک محاصره
طالبانو د بادغیس بالامرغاب او ابکمري ولسوالۍ ونیولې
