آمریکالیک میدیالرنینگ بیرقطاریدن نقل قیلینیشیچه، جاری هفته نینگ کیله‌جک کونلریده آمریکا جمهور رئیسی دونالد ترامپ، افغانستاندن 4 مینگ عسکرینی چیقاریشی خصوصیده بویروغ بیریشی ممکن.
آمریکالیک «ان‌بی‌اس» ترماغی نینگ ایتیشیچه، افغانستاندن 4 مینگ آمریکالیک عسکر چیقاریلگنده، مذکور مملکت نینگ افغانستانده قاله‌دیگن عسکرلرینی رقمی کمیده 8-9 مینگ گه ییتیشه‌دی.
حاضر ایسه افغانستانده آمریکالیک عسکرلرنینگ رقمی کمیده 12-13 مینگ بولگن.
آمریکالیک میدیالر، افغانستاندن بو عسکرلرنینگ چیقیش زمانی توغریسیده هیچ نرسه دیمه‌گن، بیراق ایتیلیشیچه، عسکرلرنی چیقاریش برنامه‌سی باسقیچ اساسیده عمل‌گه آشیریله‌دی.
بیراق، افغانستانده جایلشگن آمریکالیک کوچلر سوزلاوچیسی نینگ ایتیشیچه، حاضرگه‌قدر افغانستاندن عسکرلرینی چیقاریش خصوصیده بویروغ قولگه کیریتمه‌گن‌لر.
اونینگ اورغولشیچه، اولر کیسکین حمایه‌وی کوچلر مأموریتی گه نسبتن افغانستانلیک شریک‌لری بیلن بیرگه دیر و افغانستان ایسه هیچ قچان آمریکا و بیرلشیک‌لری گه تهدید بوله‌دیگن تروریست‌لرگه باش‌پناه بولمه‌سی توغریسیده ایشانچ بیریشه‌دی.
طالبان گروهی هردایم آمریکا بیلن بولگن تینچلیک سوزلشوولریده چیت‌ایللیک کوچلر بوتونله‌ی افغانستاندن چیقیشی‌نی طلب قیلگن، بیراق آمریکا رسمی‌لری بو کوچلردن بیر قسمی افغانستانده قالیشی اوستیگه تأکیدلیدی.
اوشبو موضوعلر آمریکا و طالبان گروهی آره‌سیده تینچلیک سوزلشوولری قیته باشلنگنیدن نیچه کون اوتگن بیرچاغده بیان ایتیله‌دی.
آمریکا و طالبان نماینده‌لری نینگ ینگی دور تینچلیک سوزلشوولری، پروان ولایتی نینگ بگرام تومنیده بگرام حربی قرارگاهی یقینیده جایلشگن فعالیت‌سیز بیر ساغلیک مرکزی گه طالبان گروهی نینگ هجومی نتیجه‌سیده 2 تینچ اهالی هلاک و باشقه 70 تینچ اهالی یره‌لنگنیدن سونگ، وقتینچه‌لیک توخته‌تیلگن. گرچند بو سوزلشوولرنی توخته‌تیش سببی تینچلیک توغریسیده اساسی موضوعلر اوستیگه کوپراق مصلحت اوتکزیلیشی دییلگن.
شو توغریده…
آمریکا و طالبان نماینده‌لری نینگ تینچلیک سوزلشوولری وقتینچه‌لیک توخته‌تیلدی
