آتی فاش ایتیلیشینی ایستمهگن حکومتی بیر منبع نینگ سلاموطندارگه ایتیشیچه، قطرده افغانستانلیکلر ارا یولگه قوییلیشی کوتیلگن تینچلیک ییغینی آرتده قالدیریلگن.
اوشبو منبع گه کوره، قطر تینچلیک ییغینی حکومتی هیأت اشتراک قیلمهگنی باعث، آرتده قالگن.
طالبان گروهی بیلن مذاکره قیلووچی حکومتی هیأت نینگ سفری هم بوگون آرتده قالدیریلگن ایدی.
اوتگن کون مملکت جمهور رئیسی محمداشرف غنی ارگده دوحه ییغینده طالبلر بیلن سوزلهیدیگن 250 کیشیلیک هیأت بیلن اوچرشگن ایدی.
جناب غنی مذکور هیأتدن طالبلرنینگ افغانستان حکومتی بیلن سوزلشی اوچون قانقتیریشی و اولرنینگ افغانستان حکومتی بیلن سوزلشدن باشقه یول یوقلیگی توغریسیده توشونتیریشی نی سورهگن ایدی.
شو توغریده…
قطر ییغینده اشتراک قیلهدیگن حکومتی هیأتی نینگ سفری توختهتیلدی
جمهور رئیس نینگ اوشبو ییغینده اورغولشیچه، بوندی فرصتلرگه تیزیمنینگ دوامی و حاضرگی سیاسی ساختارنی کوچلنتیریش خصوصیده مدافعه قیلیش کیرهک و تینچلیک خصوصیده صحبت اوتکزهدیگن هیأتدن افغانستان دولتی و یشاوچیلریدن مدافعه قیلیشی نی طلب قیلگن.
بوندن آلدین، طالبان گروهی نینگ ایتیشیچه، قطر ییغینیده کیمسه حکومت دن نمایندهلیک قیلمهیدی.
قطرده افغانستانلیکلر ارا یولگه قوییلیشی کوتیلگن ییغین کیلهجک هفته شنبه و یکشنبه کونلری افغانستان حکومتی نینگ نمایندهلری، سیاستچیلر و طالبان گروهی نینگ نمایندهلری آرهسیده یولگه قوییلیشی خصوصیده قرار قیلینگن ایدی.
