بامیان ولایتی نینگ ورس تومنی یشاوچیلری، مذکور تومن کسلخانه‌سینی ایشی 10 ییل جریانیده یکونلنمه‌گنیدن تنقید قیلیب ایتیشیچه، مذکور تومن نی 25 یاتاقیلیک کسلخانه‌سینی ایشی باشلنگنیدن 10 ییل اوتماقده، بیراق بو کسلخانه‌نی ایشی حاضرگه‌قدر یکونلنمه‌گن.
اولرنینگ ایتیشیچه، قزاقستان ایلچی‌خانه‌سی 10 ییل آلدین مذکور کسلخانه‌نی قوریلیش بودجه‌سینی توللگن و بو کسلخانه‌نی ایشی 18 آی جریانیده یکونلنیشی خصوصیده قرار قیلینگن ایکن.
بامیان ولایتی ورس تومنی یشاوچیلریگه کوره، اوشبو ولایت حاکمی اوتگن ییل ورس یشاوچیلریگه کسلخانه ایشی یکونلنیشی توغریسیده سوز بیرگن ایکن، بیراق حاکم تامانیدن بیریلگن سوز عمل گه آشیریلمه‌گن.
شونینگدیک، بامیان ولایت کینگشی اعضالریدن بیرقطاری نینگ ایتیشیچه، ورس تومنی کسلخانه‌سی توغریسیده بولگن قیین‌چیلیک‌نی بامیان حاکمی، ساغلیق‌نی سقلش وزیرلیگی و جمهور رئیس غنی بیلن شریک قیلگن‌لر، بیراق حاضرگچه بو توغریده هیچ‌قنده‌ی دقت قیلینمه‌گن.
بامیان ولایت کینگشی اعضاسی محمدامبر محمودی نینگ ایتیشیچه، ورس تومنی 25 یاتاقلیک کسلخانه‌سینی تمل تاشی بامیان ولایتی‌نینگ سابق حاکمی حبیبه سرابی نینگ زمانیده قوییلگن و بو کسلخانه قوریلیشی اوچون نظرگه آلینگن 500 مینگ دالر بودجه‌دن 300 مینگ دالری رشوه صفتی گه حکومت رسمی‌لریگه بیریلگن.
بامیان ولایتی بوییچه ساغلیق‌نی سقلش ریاست باشلیغی سیدعلی آقا ایوب ناصری نینگ ایتیشیچه، ورس تومنی 25 یاتاقلیک کسلخانه‌سینی قوریلیش ایشی آرتده قالگنی و جنجل‌لی بولگن دلیلی شرطنامه باغله‌گن شرکت شکستی دیر.
اونگه کوره، اوشبو کسلخانه قوریلیشی خصوصیده شرطنامه باغله‌گن «اتفاق میرزاد» شرکتی شکست ییگن و ملی تدارکات اداره‌سی اوتگن ییل مذکو شرکت بیلن باغلنگن شرطنامه‌نی لغو ایتیب و مسؤوللرینی عدلی و قضایی اداره‌لریگه تانیشتیرگن.
سلام‌وطندارگه صحبت بیرگن بامیان حاکمی محمدطاهر زهیر، ورس تومنی 25 یاتاقلیک کسلخانه ایشی یریم قالگنیدن شوم و فسادگه بولغنگن میراث صفتی گه ایسلب ایتیشیچه، اوشبو نامبارک میراث اوتگن حکومت و والی‌لردن قالگن.
بامیان محلی رسمی‌لریگه کوره، ورس تومنی کسلخانه‌سینی قوریلیش ایشی دوامی ملی تدارکات آرقه‌لی اعلان گه قوییلگن و قوریلیش شرطنامه‌سی تیزلیک‌که محلی بیر شرکت گه تاپشیریله‌دی.
ورس تومنی بامیان ولایتی نینگ جمعیت‌لی، کم‌بغل و اینگ قیین یوللی تومنی دیر. اوشبو تومن یشاوچیلری ساغلیک خذمت‌لری خصوصیده حکومت مسؤوللری نینگ دقت‌سیزلیگی باعث، کوپینچه قیینچیلیکلرگه روپه‌ره بولیب تورگن.
