بوگون «پنج‌شنبه» کابل‌ده خبری بیر ییغین اوتکزگن افغانستان بوییچه استراتیژیکی تدقیقات انستیتوتی، افغانستان دولتی و طالب‌لرنینگ آره‌سیده بولگن تینچلیک جریانی توغریسیده قولگه کیریتگن ینگی معلومات‌لرینی ارایه قیلدی.
افغانستان بوییچه استراتیژیکی تدقیقات انستیتوتی‌نی تدقیقاتچیسی عمر صدرنینگ ایتیشیچه، اولرنینگ فکر اورگه‌نیش تدقیقاتی‌دن قولگه کیریتیلگن معلومات‌لر اساسیده، مملکت یشاوچیلریدن 63% دن آرتیغی تینچلیک عالی کینگشی و طالب‌لر ارا بولگن سوزلشوو برنامه‌لرینی ناکام بیله‌دیلر.
اوشبو تدقیقات‌دن قولگه کیریتیلگن معلومات گه کوره، فکر اورگه‌نیش‌گه جواب بیرگن‌لردن 39% افغانستان دولتی تامانیدن تینچلیک خصوصیده بولگن ایش‌‍لرنی قبول قیلینمس دییدی. شونینگدیک، فکر اورگه‌نیش اشتراک قیلگن‌لردن 32% ایشانچی اساسیده، قوشنی مملکت‌لرنینگ سلبی اره‌لشوولری سبب بو سوزلشوولر نتیجه بیرمه‌گن.
افغانستان بوییچه استراتیژیکی تدقیقات مرکزی‌نینگ معلوماتی، 2026 کیشی بیلن اوتکزیلگن صحبت‌دن قولگه کیلگن و صحبت بیرگن‌لرگه کیکسه کیشی‌لر، یاشلر و عیاللر شامل دیر.
اوشبو فکر اورگه‌نیش‌ده اشتراک قیلگن‌لردن 42.9% عیاللر و 57.1% ایرکک‌لر تشکیل بیره‌دی.
شونینگدیک، اوشبو رقم جمعیتی‌دن 10.2 اوزبیک، 32.4% تاجیک، 36.6% پشتون، 14.7% هزاره و باشقه 6.1% افغانستانده بولگن ملیت‌لر دیر.
اوشبو ییغینده ملی خوفسیزلیک ریاستی‌نی سابق باشلیغی امرالله صالح نینگ ایتیشیچه، افغانستان بوییچه آمریکانینگ خاص نماینده‌سی زلمی خلیلزاد، طالب‌لر بیلن بولگن تینچلیک سوزلشوولری توغریسیده جمهور رئیس گه معلومات بیریش‌دن باش تارتگن و افغانستان حکومتی‌دن طالب‌لرنینگ اصلی طلبی نیمه بولگنی توغریسیده جمهور رئیس گه هیچ نرسه دیمه‌گن.
بو تدقیقات دن قولگه کیریتگن معلومات توغریسیده تینچلیک عالی کینگشی‌نینگ نظرینی اورگنماق ایسته‌دیک، بیراق مذکور کینگش‌نینگ رهبری و مطبوعاتی مسؤوللری، مملکت‌ده بولمه‌گنی اوچون سعی و حرکت‌لریمیز نتیجه‌سیز قالدی.
