سلاموطندارگه ییتیشگن حجت گه کوره، کوپینچه دولتی رسمیلر و تانیقلی سیمالر جملهدن سابق جمهور رئیسنینگ ابهسینی اوغلی حشمت خلیل کرزی، اسلامی حزب رهبری گلبدین حکمتیار، جمهور رئیسنینگ ییریک مصلحتچیسی و ملی خوفسیزلیک کینگشینینگ اورین باسری جنرال دینمحمد جرأت، ملی منسجم ایشلری بوییچه جمهور رئیسنینگ خاص نمایندهسی و ییریک مصلحتچیسی حاجی الماس زاهد، ملی مدافعه وزیرلیگی، ساغلیقنی سقلش وزیرلیگی، یانغین اوچیرووچی ریاست، مارشال محمدقسیم فهیم قوریلمهسی، احمدشاه مسعود قوریلمهسی، دوستم قوریلمهسی کبی ادارهلر، اسمارت ایگل، اخپلواک احمدزی، آصف عرفان، اطلس، شهروند، شهکار، مفکوره، مایسرویس، حیات کبی شرکتلر و شونینگدیک، چیت ایللیک تیللرنی اورگتهدیگن مرکز تبلیغاتی لوحهلرینی قیستیریش خصوصیده، شهردارلیککه سالیق بیریشدن باش تارتگن. کابل شهردارلیگینینگ ایتیشیچه، اوشبو پول قولگه کیریتیلگن صورتده، آست قوریلمه، جادهلر، پارکلر، تازهلش، سبزوات، یشش محیط، ریکلام، معلومات بیریش و مدنیت توزهتیش بولیملریگه صرف ایتیلردی. شونینگدیک، یشاوچیلرنینگ ایتیشیچه، دولتی سالیق تیزیم و ملاحظه سیز شکلده توپلنگن صورتده، شهری خذمتلر کوپهییب و شونینگدیک، شهردارلیکدن اهالی رضایتی کوپهییشی ممکن. بو گزارشده قیسی قوریلمه یا-ده کیملر شهردارلیکدن قنچه قرضدار بولگنینی کورسهتیشیمیز یانیده، قرضدار قوریلمهلر و تانیقلی سیمالرنینگ عکسالعمللرینی اورگهنیش اوچون سعی و حرکت قیلدیک.
مارشال فهیم قوریلمهسی کمیده 15 بیلبوردنی چهلستون جادهسی، اوچینچی پروان تورت یولی، برهکی تورت یولی، دهن باغ، کلولهپشته، وزیراکبرخان، پل پغمان، کوتل خیرخانه و کابل شهرینینگ باشقه نیچه منطقهسیده قیستیرگن.
سلاموطندارگه ییتیشگن حجت اساسیده، مارشال فهیم قوریلمهسی قویاش 1391- ییلدن 1396- ییلگچه هر ییل کمیده 1 میلیون و 200 مینگ افغانی شهردارلیک سالیغینی توللمهگن. اوشبو پول 6 ییل جریانیده توپلم شکلده، 7 میلیون و 200 مینگ افغانی بولهدی. بیراق مارشال محمدقسیم فهیم قوریلمهسینی مدنی بولیمی باشلیغی نجیب بارورنینگ ایتیشیچه، مارشال قوریلمهسی مارشال فهیم اولگنیدن بیر ییل اوتگنیدن سونگ ایجاد ایتیلگن و شهردارلیکدن هیچ قندهی قرضدارلیگی یوق دیر. جناب بارورگه کوره، مملکت سابق جمهور رئیسی حامد کرزی نینگ بیرینچی اورین باسری محمدیونس قانونی، قویاش 1393- ییلده کابل شهرینینگ برچه منطقهسیده مارشال فهیم نینگ 22 بیلبوردی قیستیریلیشی توغریسیده بویروغ بیرگن. اوشبو بویروغ اساسیده، مارشال محمدقسیم فهیم قوریلمهسی، شهردارلیککه سالیق توللشدن معاف بولگن.
عین حالده، حامد کرزی حکومتینینگ دورانیده وزیرلر کینگشی دارالانشاء و اداری ایشلر عمومی باشلیغی صادق مدبرنینگ جمهورلیک ریاستی بیرینچی اورین باسرلیک دفترینی مکتوبی گه جواب یازیشیچه، «ایتیش لازم ریکلام و خصوصی شرکتلردن بیرقطاری مملکتنینگ ملی و تانیقلی سیمالرینینگ قوریلمهسی و آتلریدن فایدهلنیب شهرنینگ ایریم منطقهلریده بیلبورد قیستریش رخصتینی آلهدی؛ بیر آز مدت اوتگنیدن سونگ، تانیقلی سیمالرنینگ صورتلرینی کوتریب و اونینگ بیلبوردی دن سوداگرلیک ریکلامی اوچون فایدهلنهدی». اوشبو موضوع گه اساس جناب مدبر یونس قانونینینگ بویروغی گه موافقت بیلدیرهدی.
لوحهلرنی تنظیم قیلیش مدیریتی نینگ 890- مکتوبی گه کوره، کابل تورلی منطقهلریده 13 بیلبورد نصب ایتیلیش امری کابل بلدیهسینینگ کلتوری خذمتلر باشلیغی راحله کوهستانی تامانیدن تصدیق لنگن.
مارشال فهیم بنیادینینگ رسمیلری و اوشبو صحبت لرگه کوره، محمدقسیم فهیم تبلیغی بیلبورد قرضدارلیگی نی بیریشگه هیچکیم مسوول ایمس دیر.
احمدشاه مسعود بنیادینینگ هم کابل شهری نینگ وزیر محمداکبرخان، مرادخوانی، پل آرتل، جوشیر، جاده قصبه، کارته نو، باغ بالا، چهارراهی سرای شمالی، چهارراهی سرسبزی، خیرخانه و باشقه منطقهلرده 15 بیلبوردی بار. مذکور بیلبوردلردن کوپینچه سی کابل شهرینینگ اساسی منطقهلریده نصب ایتیلگن. احمدشاه مسعود بنیادی، 1391-ییل دن 1396- ییل گهقدر بیلبوردلر مالیهسی نی بیرمهگن و کابل بلدیه سیدن 9 میلیون 216 مینگ افغانی قرضدار دیر. اوشبو توغریده احمدشاه مسعود بنیادی رسمیلرینینگ فکری نی آلیش اوچون سعی و حرکت قیلدیگ بیراق موفق بولمهدیگ.
دوستم بنیادی هم کابل بلدیه سیدن بیلبوردلر مالیهسیدن 22 مینگ 500 افغانی کابل بلدیه سیدن قرضدار دیر.
جمهور رییسنینگ ارشد مصحلتچی سی جنرال دینمحمد جریت هم بیلبوردلر مالیه سیدن 1 میلیون 236 مینگ افغانی کابل بلدیه سی دن قرضدار دیر.
بنیادلر چکهسیده، تانیقلی و زورهوان کیشیلرگه تیگیشلی بولگن قطار تبلیغاتی شرکتلر هم مالیهلرینی بیرمهگن. و اوشبو توغریده افغانمشعل تبلیغاتی شرکتی باشقه شرکتلردن کوره کپراغ قرضدار.
حجت لرگه کروه، افغان مشعل تبلیغاتی شرکت جمهور باشلیغنینگ ارشد مصلحتچی سی حاجی الماس زاهد گه تیگشلی بولیب و 1389- ییل دن 1394- ییل گهقدر مالیه سی نی بیرمهگن و کابل بلدیه سیدن 44 میلیون 497 منیگ و 180 افغانی قرضدار دیر.
بو توغریده افغانمشعل شرکتی رسمیلرینینگ فکرینی آلیش اوچون سعی و حرکت قیلدیگ؛ بیراق بیزیم دواملی تماسلریمیزگه جواب قیترمی و سلاموطندار بیلن صحبت قیلیش گه تیار بولمهدی لر.
افغانمشعل شرکتی دن سونگ، مایسرویس تبلیغاتی شرکتی کوپ قرضدار بولگن شرکتلردن دیر. حجت لرگه کوره، کابل هوا قونالغه سیده بولگن 38 اعلانات تخته مایسرویس شرکتی تیگیشلی بولیب و 1397- ییلدن 1396- ییل گهقدر بیلبوردلر مالیه سی نی بیرمهگن و کابل بلدیه سیدن 28 میلیون و 320 مینگ و 6 افغانی قرضدار.
مایسرویس شرکت باشلیغی میرویس یوسفینینگ ایتیشیچه، اون ییلدن بویان اوشبو شرکت افغانستانده فعالیت قیلهدی و بوتون حسابلری پاس بولگن، کابل بلدیه سیدن هیچ قرضدار ایمس. اونینگ ادعا قیلیشیچه، مایسرویس شرکتینینگ کابل بلدیه سی بیلن هیچ قندی قرار دادی یوق و کابل هوا قونالغه سیده بولگن بیلبوردلر ترانسپورت وزیرلیگینینگ هماهنگلیگی و شراکتی اساسیده نصب ایتیلیب و درآمدلردن 51 فایزی ترانسپورت وزیرلیگی گه بیریلهدی.
اسمارت ایگل ریکلام شرکتی، 7میلیون و 149مینگ و 800 افغانی؛ اخپلواک احمدزی، 4 میلیون و 72 مینگ و489 افغانی؛ حیات، 4 میلیون و 390 مینگ و 560 افغانی؛ شهکار 2 میلیون و 896 مینگ 320 افغانی؛ آصف عرفان، 3 میلیون و 543 مینگ و 987 افغانی؛ شهروند، 2 میلیون و 905 مینگ و 392 افغانی؛ اطلس، 927 مینگ و 360 افغانی؛ مفکوره 847 مینگ و 743 افغانی و چیت ایللیک تیل اورگنیش مرکزی، 2 میلیون 716 مینگ و 562 افغانی کابل بلدیهسیگه سالیق توللمهمگن. مذکور شرکتلردن قطارینینگ فکرینی اورگنیش ایستهدیک بیراق کوپینچه سعی و حرکت بیلن بو ایشگه موفق بولمهدیک.
جمغرمهلر و خصوصی شرکتلرنینگ یانیده مدافعه وزیرلیگی، عامه ساغیلک وزیرلیگی، مالیه وزیرلیگی، حج وزیرلیگی و سوو و برق وزیرلیگی بیلبوردلری نینگ سالیقینی توللمهسلیگی اوچون کابل بلدیهسیدن قرضدارلر و بولرنینگ آرهسیده مدافعه وزیرلیگی و عامهساغلیک وزیرلیگی اینگ کته قرضگه ایگه دیر.
کابل نینگ 22- ناحیهسیده مدافعه وزیرلیگی نینگ 47 ریکلامه بیلبوردی بار و مذکور بیلبوردلر اوچون 3 میلیون و 384 مینگ افغانی کابل بلدیهسی گه سالیق توللشی کیرک. 6 ییل اوتیشی بیلن مدافعه وزیرلیگینینگ قرضی 20 میلیون و 384 مینگ افغانیگه ییتیشگن. مدافعه وزیرلیگی سوزلاوچیسی محمدرادمنش نینگ ایتیشیچه، مدافعه وزیرلیگینینگ برچه بیلبوردلری حربی قطعهلر بولهدیگن منطقه لرگه دیر و جمهور رییسنینگ حکمی اساسیده مدافعه وزیرلیگی سالیق توللشیدن معاف دیر.
شونینگدیک ساغلیک وزیرلیگی هم قرضدار دیر. اوشبو وزیرلیک باشکنتده 47 بیلبورد نصب ایتگن و 1391 – ییل دن بویان کابل بلدیهسیگه بیلبوردلرنینگ سالیقی نی توللمهگن. ساغلیک وزیرلیگی ییل ده 360 مینگ افغانی توللشی کیرک ایدی و بیلبوردلرنینگ سالیقی 1391- ییل دن 1396- ییل گه قدر 2 میلیون و 160 مینگ افغانی بولگن. سلام وطندارگه صحبت بیرگن ساغلیک وزیرلیگی مالی باشلیغینینگ ایتیشیچه، اوشبو وزیرلیکنینگ کابل بلدیهسیدن هیچ قندی قرضی یوق دیر و شهردهگی بیلبوردلرنینگ کوپینچهسی عامه ساغلیک وزیرلیگی بیلن یاردمچی بولگن اینجولر و موسسهلردن دیر.
کابلنینگ اطفاییه ریاستی 1391- ییلدن بویان بیلبوردلرینینگ سالیقی نی توللمهگن؛ و اوشبو وزیرلیک ییلده 480 مینگ افغانی توللشی کیرک ایدی و بو رقم سونگی 6 ییلده 5 میلیون و 40 مینگ افغانی بولردی.
قطار مشهور کیشیلر و حکومت رسمیلرینینگ قرضی وزیرلیکلر و شرکتلرگه کوره آز دیر بیراق مذکور کیشیلرهم مقداری آز بولگن سالیقنی بلدیه گه تولهمگن.
حشمت خلیل کرزی 80 مینگ افغانی؛ اسلامی حزبینینگ رهبری گلبدین حکمتیار 36 مینگ افغانی؛ ریاضی بیلرمان و فیلسوف محمدصدیقافغان 22 مینگ و 500 افغانی؛ داوودزی گروپ 34 مینگ افغانی؛ رحیم گردیزی 45 مینگ افغانی و باشقه قطار کته کیچیک شرکتلر بلدیهدن قرضدار دیر.
کابل بلدیه سیدهگی ایشانچلی منبعلرنینگ ایتیشیچه، بو کیشیلردن قطاری سالیقلرینی تولهمگنی یانیده بلدیهنینگ مکتوبلریگه جواب قیترمهگن و بعضن مذکور اداره ایشلاوچیلرینینگ کلتکلشگه تهدید قیلگن.
