تخار ولایتینینگ دشتقلعه تومنی بیش کون آلدین، طالبلرنینگ قولیگه سقوط قیلدی.
محل یشاوچیلرینینگ ایتیشیچه، طالبلرگه قرشی امنیتی کوچلر و مردمی کوچلر مقاومت قیلمهگنی باعث، مذکور تومن سقوط قیلگن.
بیراق، دشتقلعه تومنیده محلی پولیس قومندانلریدن بیری وکیلخان آقانینگ سلاموطندارگه ایتیشیچه، دشتقلعه تومنی طالبلرنینگ قولیگه سقوط قیلیشیده تخار ولایتیده اسلامی حزب امیری و مذکور ولایتنینگ تینچلیک عالی کینگشی باشلیغی مامور حسننینگ آدملری همکارلیک قیلگن و دشتقلعه تومنینینگ پولیس قومندانلیگی اوستیگه بولگن بیرینچی هجوم تخارده اسلامی حزب امیری مامور حسننینگ اوغلی تامانیدن اویوشتیریلگن.
تخار ولایتیده آتی فاش ایتیلیشینی ایستمهگن ایشانچلی امنیتی منبعلردن بیری، بو ادعانی تصدیقلیدی.
شونینگدیک، تخار حاکمی داکتر فضلالله مجددینینگ ایتیشیچه، دشتقلعه تومنی محلی رقابتلر باعث، طالبلرنینگ قولیگه سقوط قیلگن و بو سقوط محلی قومندانلردن بولگن مومن چریکنینگ قضیهسیگه یقین باغلیق دیر. دشتقلعه تومنینینگ سقوطیدن بیر کون آلدین، مومن چریک قیین آتهسینی اولدیریشگه عیبلنیب پولیس کوچلری بیلن قیلگن اوروشده هلاک ایتیلگن ایدی.
جناب مجددی گه کوره، تخار ولایتیده اسلامی حزب امیری و مذکور ولایتنینگ تینچلیک عالی کینگشی باشلیغی مامور محمدحسن، محلی قومندانی بولگن مومن چریک اوچون دادخواهلیک قیلردی و اونینگ ایتیشیچه، پولیس چریک نینگ حقی گه جفا قیلگن.
بیراق، مامور محمدحسن بو ادعالرنی رد قیلیب ایتیشیچه، او منطقه خوفسیزلیگی تأمینلنیشی توغریسیده سعی و حرکت قیلهدی و دشتقلعه تومنینینگ سقوطی گه هیچ قندهی رول اوینمهگن.
دشتقلعه تومنی طالبلرنینگ قولیگه سقوط قیلگنیدن سونگ، امنیتی کوچلر تیزلیکده عملیات یولگه قوییب و مذکور تومننی قیتهدن نظارتگه آلدیلر، بیراق طالبلر حاضرگچه تومن مرکزینینگ یقینیده جایلشگن و مرکز اوچون جدی تهدید سنلهدی.
شونینگدیک، اوتگن کون مذکور تومنده طالبلرگه قرشی حربی کوچلر تامانیدن یولگه قوییلگن عملیات هیچ بیر نتیجه بیرمهگن.
