جوزجان یشاوچیلری‌نینگ ایتیشیچه، مذکور ولایت محلی حکومتی بنگی‌لر یششی و مخدره ماده ساتیلیشی اوچون بیر سرای نی اختصاص بیرگن. اوشبو «بنگی‌لر سرایی» آتلی سرای ده یوز دن آرتیق بنگی یشه‌یدی و بو سرای درزاب بندری منطقه‌سیده جایلشگن.
اوشبو سرای اطرافیده‌گی یشاوچیلرنینگ ایتیشیچه، حکومت بنگی‌لرنینگ دارولش و اولرنینگ جانی‌نی قوتقریش اورنیده، اولر مخدره ماده قول تاپیش‌لری اوچون زمینه یره‌تگن.
محل یشاوچیلریدن بیری محمدبشیر، حکومت تشکیلاتیده قطار کیشی‌لرنی بنگی‌لر اوچون قولی‌لیک یره‌تیش‌گه عیب‌لب ایتیشیچه، بو کیشی‌لر بنگی‌لر سانی کوپه‌ییب و مخدره ماده بازاری قیزیقیشی اوچون سعی و حرکت قیله‌دیلر.
بیراق، مذکور سرای بنگی‌لری‌نینگ ایتیشیچه، بو ییرده یشش‌گه سرای ایگه‌سی اولردن پول آله‌دی و شونینگ‌دیک، امنیتی کوچلرگه رشوه بیره‌دیلر. اولرگه کوره، تیلنچیلیک‌دن سرای ایگه‌سی و امنیتی کوچلرنینگ پولی‌نی بیره آلمه‌گن صورتده، «قوللریدن کیلگن ایش‌گه قول اوریب پول تاپه‌دیلر.»
اوشبو بنگی‌لردن بیری عبدالحمیدنینگ ایتیشیچه، نیچه مرته امنیتی کوچلر تامانیدن بنگی‌لر چیقاریلیشی‌گه گواه بولگن، بیراق کوپ وقت اوتمه‌ی پول بدلی‌گه قوییب یوباریلگن.
جوزجان پولیس قومندانلیگی‌نینگ خوفسیزلیک آمری عبدالحفیظ خاشی بنگی‌لرگه جای اجره‌تیلگنی‌نی رد قیلیب ایتیشیچه، اولر تیزلیک‌ده بولرنی توپلش ایشی‌نی باشله‌یدیلر.
سونگی رقم‌لر اساسیده، افغانستانده بنگی‌وار ماده ایشلب چیقاریش 87 فایز یوقاری کیتگن. بیرلشگن ملت‌لر تشکیلاتی‌نینگ بنگی‌وار ماده و جنایت‌گه قرشی کوره‌ش اداره‌سی تامانیدن ترقه‌تیلگن گزارش اساسیده، میلادی 2017- ییل‌ده افغانستانده بنگی‌وار ماده ایشلب چیقاریش میزانی، اوتگن ییل‌لرگه نسبتن 4800 تُن دن 9 مینگ تُن گه ییتیشگن.
بو گزارش‌ده ایتیلیشیچه، بو ماده ایکیله‌دیگن ییرلر 201 مینگ هکتاردن 328 مینگ هکتارگه یوقاری کیتگن.
