د وچکالۍ او نورو اقتصادي ستونزو له امله هر سهار ځېنې مالداران له خپلو رمو یوه برخه ښار ته د پلور لهپاره بیايي او په پیسو یې خپلو پاتې مالونو ته خوراکي توکي اخلي.
جوزجاني مالدارانو سلام وطندار ته وویل چې د وروستیو وچکالیو له امله یې ډېر مالونه له منځه تللي او ډېر مالي زیانونه ور اوښتي دي.
دوه تنه مالداران جانمحمد او جلالالدین چې وچکالۍ له ستونزو سره مخکړي ـ وايي چې د ۵زرو افغانیو مال یې په ۵سوه هم خرڅ کړی.
دوی وايي د وچکالۍ د شدیدې څپې له امله یې نه اولادونو ته او نه هم خپلو څارویو ته خواړه پیدا کولی شي.
جانمحمد او جلالالدین ـ چې په اوونۍ کې یو ځل د خپلې رمې څو مالونه د پلور لهپاره ښار ته وړي ـ وايي، که دولت یا مرستندویه سازمانونه مرستې ور ونهرسوي؛ ښايي ماشومان یې هم د مالونو په څېر له لوږې مړه شي.
د جوزجان د کرنې او مالدارۍ مشر محمدعالم عالمي مني چې د جوزجان د مالونه له ۲ میلیونو څخه ۴۰ سلنه یې له منځه تللي دي او پاتې ۶۰ سلنه هم د وچکالۍ له جدي ګواښ سره مخ دي.
په جوزجان کې واښه پلورونکي وايي چې د یو جوال وطني وښو بیه تېر کال شاوخوا ۴ سوه افغانۍ وه؛ خو سږکال بیا له ۷۰۰ تر ۱۰۰۰ افغانیو ته ختلې ده.
