وروسته له هغې ـ چې د کابینې د تېرې چهارشنبې په ورځ د کانکور ازموینې داوطلبانو سهمیهبندۍ طرحه تاییده کړه ـ د ټولنیزو شبکو یو شمېر کاروونکیو دغه طرحه قومي وبلله او د هغې پر وړاندې یې مخالفت څرګند کړ.
خو د لوړو زدهکړو وزارت چارواکیو نن کابل کې د یوې خبري غونډې پرمهال دغو اندېښنو ته د پای ټکی کېښود او ويې ویل، کانکور یوه رقابتي پروګرام دی او هېڅکله به د ولایتونو نفوس په اساس سهمیهبندي نهشي.
د لوړو زدهکړو وزارت ویاند فیصل امین وايي، د ملي کانکور نوې طرحه جامع او هېواد کې د لوړو زدهکړو اوسنیو شرایطو په مطابق جوړه شوې چې لهمخې یې د عمومي کانکور ۷۵ سلنه او د هر زون په سطحه هم ۲۵ سلنه څوکۍ رقابت ته وړاندې کېږي.
ښاغلی فیصل زیاتوي چې د کانکور سراسري ازموینه د تېرو کلونو په څېر په عمومي ډول اخېستل کېږي؛ خو د زونونو په کچه د طب، انجینیرۍ، حقوقو، اقتصاد، کرنې او کمپیوټر ساینس څانګو کې د کانکور ۲۵ سلنه څوکۍ په جدا ډول ترسره کېږي.
هاخوا د پوهنې وزارت ویاندې نوریې نزهت دې غونډې ته وویل چې د کانکور نوې طرحه قومي نهده، بلکې دغه طرحه هېواد کې د لوړو زدهکړو اوسنیو شرایطو په مطابق جوړه شوېده.
د مېرمن نزهت په وینا، دغه طرحه ټولو قومونو ته د متوازنو زدهکړو برابرولو په موخه جوړه شوېده.
لهدې سره د ولسي جرګې یو شمېر غړیو هم د کانکور سهمیهبندۍ طرحې سره مخالفت کوي او وايي، د کانکور سهمیهبندۍ طرحه د هېواد ځوان نسل سره خیانت دی.
د هغوی په وینا، د دې طرحې عملي کېدل د هېواد راتلونکې ته هم جدي ګواښ پېښوي.
کومه طرحه چې کابینې تېره اوونۍ تاییده کړه، له کابل پرته ځېنو څانګو کې د کمو پرمختللو ولایتونو کانکور ازموینې ورکوونکیو لهپاره مشخصه سهمیه په پام کې نیول شوېده.
د کابینې له لوري تایید شوې طرحې ټولنیزو شبکو کې د خلکو پراخ غبرګونونه هم راپورته کړيدي.
