.jpg)
د تخار ولایتي شورا او مدني ټولنې وايي، که څه هم د ولسي تړون پروګرام تر یو کال وروسته پهدې ولایت کې پیل شوه، خو تراوسه یې شوراګانې جوړې کړې نهدي.
د تخار د ولایتي شورا غړی اعظم افضلي سلاموطندار ته وویل، د دغه پروګرام ټولنیز کارکوونکي د قومي لانجو په حل کې تجربه نهلري، شوراګانې نهشي جوړولی او همدا لامل دی چې د دغه پروګرام چارې مخې ته نه ځي.
په همدې حال کې د تخار د مدني ټولنو د شبکې رییس منیر هدف باور لري چې د د خلکو لهپاره د ولسي تړون د پروګرامونو نه پلي کېدل به د خلکو او حکومت ترمنځ واټن نور هم ډېر کړي.
نوموړی د دغه پروګرام د رهبرۍ په کچه د مدیریت په کمزورۍ نیوکه کوي او وايي، یاد پروګرام باید پلی شي چې خلک له حکومت سره ځانونه نږدې احساس کړي.
خو په تخار کې د ولسي تړون د پروګرام مسوول طارق مردان د پروګرام د ځنډ لامل په مرکز کې یې د قرارداد په لاسلیکولو کې ځنډ بولي.
نوموړی په چټکۍ سره د دغه پروګرام د تطبیق په اړه ډاډ ورکوي او وايي، تراوسه یې د ۸۴۷ شوراګانو له ډلې ۳۳۶ هغه یې تر بیاځلي ټاکنو وروسته جوړې کړې دي. مردان زیاتوي، د ولایت په کچه یې ۷۲ پروژې وړاندیز کړي چې ۲۰ یې منل شوي او تر هغې چې سیمهییزې شوراګانې جوړې نهشي، نورې پروژې په نوملړ کې شاملولی نهشي.
ولسي تړون، د ملي پیوستون پروګرام پرځای د هېواد په کچه پلی کېږي چې بنسټیز خدمتونه یې خلکو د اوبو رسول، د سړکونو جوړول او د برېښنا رسولو شبکو جوړول دي. په دغه پروګرام کې د تخار ولایت هغه ۸ ولسوالۍ د ۴ کلونو لهپاره په پام کې نیول شوي چې د نورو هغو په پرتله پهکې لږ پروژې پلې شوې دي.
