وسلهوالو طالبانو تېره شپه د تخار خواجهغار ولسوالۍ «قندهاري» سیمه کې د محلي پولیسو په یوې پوستې برید کړی چې لومړی یې دغه پوسته کې ۸ امنیتي ځواکونه وژلي او وروسته یې د هغوی جسدونه سوځولي دي.
د تخار ولایتي شورا غړی محمداعظیم افضلي وايي د دې پوستې یو سرتېري طالبانو سره اړیکه لرله چې مخالفان د هغه په مرسته توانېدلي برید وکړي او خپله دغه سرتېری هم طالبانو سره تښتېدلی دی.
طالبان د خواجهغار ولسوالۍ په پراخو برخو کنټرول لري چې یوازې د خواجهغار مرکز او ورڅېرمه سیمې د امنیتي ځواکونو په ولکه کې دي.
د تخار امنیې قوماندانۍ ویاند خلیل اسیر وايي، ډېر ژر به خواجهغار ولسوالۍ کې د طالبانو ځپلو علمیات پیل شي. د ده په خبره، دښتکلا کې عملیات پیل شوي چې له پای ته رسېدلو وروسته به خواجهغار کې هم پیل شي.
د تخار خواجهغار او دښتکلا ولسوالیو کې د طالبانو فعالیتونو پراختیا له امله دې وروستیو وختونو کې سلګونه کورنۍ کډه کېدو ته اړې شويدي.
دوه ورځې وړاندې د پوځ ځواکونو هم اعلان وکړ چې دښتکلا ولسوالۍ کې د طالبانو ځپلو عملیات پیل شوي او د دې ډلې له موجودیته د ټولو ولسوالو تر پاکولو پورې به دوام پیدا کړي.
