یوشمېر کابل ښاریان وايي، هېواد کې وروستیو ناامنیو ته په کتو، په ډاډه زړه د اختر ورځې نهشي نمانځلی.
د دوی په باور، ناامني یې په وړاندې ستره ننګونه ده او د دې لهپاره چې په کوم برید او چاودنه کې قرباني نهشي، د اختر ورځو کې به چکرځایونو او د خپلوانو کره تګ ته زړه ښه نهکړي.
کابل ښاریان غلام غوث او محمدرفېع باوري دي چې جګړو او تاوتریخوالي له خلکو هوساینه اخیستې او د راتلونکي اختر نمانځلو لهپاره یې دوه زړي کړي دي.
دوی له امنیتي ادارو غواړي چې هرمهال، په ځانګړي ډول د اختر ورځو کې د خلکو امنیت ته پام وکړي او هېوادوالو ته په ارامۍ سره د دې خوښیو نمانځلو لهپاره زمینه برابره کړي.
خو د کورنیوچارو وزارت ویاند نجیب دانش د اختر ورځو کې د خلکو امنیت ټینګښت برخه کې د یوې ځانګړې طرحې خبر ورکوي او زیاتوي چې له مخې به یې سر له سبا عملي اقدامات پیل شي.
امنیتي ځواکونه به د یادې طرحې له مخې ټولې تفریحي سیمې، سړکونه او لویې لارې، جوماتونه او ګڼمېشتې سیمې تر پوښښ لاندې راولي.
د دانش په وینا، اړوند پولیس او مسوولان به په اظهاراتو کې وي او هېوادوال په پوره ډاډ کولی شي، د اختر ورځې ونمانځي.
بلخوا خلک راتلونکي لوی اختر کې د افغان حکومت او وسلهوالو طالبانو ترمنځ اوربند ته هم سترګې په لار دي او هیله لري چې د تېر اختر په څېر به د دواړو لوریو له لوري بیا اوربند وشي.
د سولې عالي شورا مرستیال حاجي دینمحمد لوی اختر کې هم د افغان حکومت او وسلهوالو طالبانو ترمنځ د اوربند په اړه ډاډ ورکوي او زیاتوي چې افغان حکومت اوږدمهالی اوربند غواړي او ورته ژمن دی، خو طالبان به د تېر په څېر بیا هم پر لنډمهالي هغه ټینګار وکړي.
افغان حکومت او وسلهوالو طالبانو په تېر کوچني اختر کې اوربند وکړ چې له مخې یې ګڼ شمېر هېوادوال د طالبانو تر ولکې لاندې سیمو او طالبان هم د پلازمېنې په ګډون، د ولایتونو ښارونو ته لاړل.
د دې اوربند له کبله په ټول هېواد کې د ترهګریزو پېښو او ناامنیو کچه راټیټه شوه او خلکو په ارامۍ سره د اختر خوښۍ ونمانځلې، خو د طالبډلې مشر ملاهیبتالله د لوی اختر په مناسبت د دې ډلې له لوري خپاره شوي پیغام کې هېڅ ډول اوربند ته اشاره نهده کړې.