افغان ولسمشر محمداشرف غني غزني ولايت ته د خپل سفر پر مهال نن سهار په امنیتي غونډه کې ګډون وکړ.
ولسمشر غني پر غزني د وسلهوالو طالبانو برید د سولې لهپاره یو ډول مانور ښودل او له دې لارې په سولې کې د ډېرو امتیازاتو ترلاسهکولو لهپاره ناوړه هڅه بولي. ده د امتیاز د غوښتلو په پار د وینو تویول ناسم کار وګڼلو.
افغان ولسمشر دا هم وویل چې د سولې په پار هر ډول خبرو اترو ته یې دروازې پرانېستې پرېښې دي.
طالبانو د اګسټ پر ۱۰مه یا د وړمې جمعې شپه له څلورو خواوو نه پر غزني ښار بریدو پیل کړل او تر چهارشنبې د دوی او حکومتي ځواکونو ترمنځ په ځېنو څنډو کې نښتې روانې وې.
ولسمشر غني د پاکستان پوځ پر لویدرستیز جنرال قمر باجوه غږ وکړ چې د طالبانو درملنه د دې هېواد په روغتونونو کې کېږي او دا هغه ستونزه ده چې د خېبرپښتونخوا سیاسي مشرانو، خبریالانو او مدني فعالانو پرې پاکستان وننګولو.
د غزني له جګړې نه پاکستان ته د ځېنو وسلهوالو طالبانو د جسدونو له لېږد وروسته د خېبرپښتنوخوا ډېرو سیاستوالو وویل چې د غزني د جګړې مړي پاکستان ته وړل شويدي او پاکستان باید د دې ځواب ووايي.
د طالبانو په جګړې د حکومتي ودانیو تر څنګ عامه شتمني هم زیانمنه شوې او همداراز د غزني ځېنې تاریخي اثارو هم زیان لیدلی دی.
ښاغلي غني ژمنه وکړه چې بالاحصار به رغول کېږي او د اوبو د کانالیسزاسیون ترڅنګ به د غزني د بیارغونې په پار ۲۰میلیونه ډالر ځانګړي کړي.
پهدې غونډې کې د ملي دفاع وزارت لویدرستیز سترجنرال محمدشریف یفتلي وویل، په غزني کې د نجات چاڼیز عملیات دوام لري او په سم ډول مدیریت کېږي. هغه زیاته کړه، د ښار امنیت عادي حالت ته راګرځېدلی او په بېلابېلو برخو کې یې امنیتي کمربندونه جوړ شويدي.
