د بامیانو لسګونو اوسېدونکیو د هغې پرېکړې په غبرګون کې لاریون وکړ چې د قدوس او مامورې په نوم یې دوه میینان سره بېل کړل.
د مامورې په نوم پښتنه د بامیانو د کهمرد ولسوالۍ اوسېدونکې شاوخوا یوه اوونۍ مخکې له هزاره قدوس سره وتښتېده؛ خو سیغان ولسوالۍ کې د پولیسو له لوري له نیولو وروسته د بامیانو مرکز ته لېږدول شوه.
د بامیانو د ښځو چارو ریاست او د بشري حقونو ولایتي کمېسیون دفتر په لارښوونې، ماموره نومې پښتنه پېغله امن کور ته لېږدول شوېوه.
کومه پرېکړه چې د بامیانو والي، د بشري حقونو ولایتي دفتر، د ښځو چارو رییسې، د مامورې خپلوانو او د کهمرد ولسوالۍ مشرانو ترمنځ شوېوه؛ د هغې پر بنسټ ماموره کهمرد ولسوالۍ ته ولېږدول شوه.
خو نن د بامیانو لسګونو اوسېدونکیو لاریون وکړ او دغه پرېکړه د مامورې او قدوس د خوښې خلاف بولي.
د لاریونویو ګډونوال عبدالله دانشیار وايي، هغه وخت چې ماموره د امن له کوره ویستل کېدله؛ په ژړا او چېغو وهلو یې خپله نارضایتي څرګنده کړه او په چېغو ـ چېغو یې وویل، هغه کسان چې د دوی د ځان تضمین کوي؛ ښايي یو کال ژوندي پاتې شي او وروسته له هغې دوی دواړه ووژل شي.
د ده په خبره، د مامورې غوښتنې ته هېڅ پام ونهشو او هغو کسانو ته یې په لاس ورکړه، چې په جدي ډول یې د جینۍ غوښتنه کوله.
لاریونوالو ځايي چارواکي د قانون په ماتولو تورن کړل او د قدوس او مامورې د واده کولو غوښتنه یې کوله.
د قدوس کاکا خلیفه امین وايي، کله چې د قدوس کورنۍ د مامورې لیدو ته امن کور ته ورغلې وه؛ د امن کور مسوولانو د قدوس خپلوانو ته د لیدو اجازه نهوه ورکړې.
د قدوس تره د بامیانو والي په معاملې کولو تورنوي او زیاتوي چې ماموره یې د مولوي کبیر په نوم کس ته سپارلې ده. ویل کېږي چې مولوي کبیر د سیمي کوم خان دی.
