د یاد ښوونځي یوشمېر زدهکوونکي وایي چې د دوی د بدل اعاشې او ترانسپورټ پیسې حیفومیل کېږي.
د غزني د ځانګړو زدهکړو ښوونځي یو زدهکوونکی او د معلولینو حقونو یو فعال محمد رضا ذهین سلاموطندار ته وویل دغه ښوونځی فساد پرسر اخیستی دی.
په دې ښوونځي کې چې نابینایان او کاڼه کسان زدهکړې کوي، مسوولین یې د دوی اعاشې او ترانسپورټ پیسې حیفومیل کوي.
د ښاغلي ذهین په وینا په داسې حال کې چې د ځانګړو زدهکړو ښوونځي زدهکوونکیو ته ۱۸۰۰ افغانۍ د بدل اعاشې لهپاره په پام کې نیول شوي خو د ښوونځي مسوولین نابینا زدهکوونکیو ته ۱۲۰۰ افغانۍ او کڼو ته ۵۰۰ افغانۍ ورکوي.
ذهین وايي، دغو زدهکوونکیو ته د ترانسپورټ پیسې ځانته ورکول کېدې خو اوس یې درک ورک دی.
د غزني د ځانګړو زدهکړو ښوونځي یو نابینا زدهکوونکی حفیظ الله حسیني هم وایي د بدل اعاشې او ترانسپورت پیسو د ورکړې په اړه د ښوونځي نوم لیکنې پلاوي ژمنې عملي نه شوې.
دغه زدهکوونکی زیاتوي دلته خیالي زدهکوونکي موجود دي او ټول امتیاز ورته حواله کېږي.
خو د غزني د پوهنې ریاست تدریسي مرستیال نثار احمد ازاد زوی د دغو زدهکوونکیو څرګندونې ردوی او وایي د نابینا زدهکوونکیو ټولې پیسې په رڼه توګه ورکول کېږي او په وینا یې که دغه کسان هره ستونزه ولري باید له دوی سره یې شریکه کړي.
څو ورځې وړاندې د غزني ولایتي شورا ځینو غړیو او د دغه ولایت پوهنې ریاست چارواکیو له سلاموطندار سره په خبرو کې په دغه ریاست کې د کارکوونکو ګومارنو کې د ځانګړو سیاسي ډلو لاسوهنو په اړه شکایت کړی و.
د دوی په وینا دې لړۍ په یاد ریاست کې د فساد ضد مبارزې مخه ډب کړې ده.
