لومړي لپاره په هېواد کې د DNA ازموینو مرکز رامنځته او ګټې اخيستنې ته وسپارل شو. دغه مرکز په داسې حال کې په فعالیت پیل کوي چې له دې وړاندې د DNA معاینات فرانسې او کاناډا ته استول کېدل او نږدې دوه میاشتې وخت یې اخيست چې پایله هېواد ته را ورسېږي او د قانوني ډاکټر په واک کې ورکړل شي.
د عامې روغتیا وزیر فېروز الدین فېروز وايي، د دغه مرکز په فعالېدو سره به د افرادو د هویت د تثیبت، د زېږون د اړیکو پېژندلو، د اشخاصو د قومي او نژادي ریښو او دغه شان نورو مسایلو په اړه لا ډېرې او غوره اسانتیاوې چمتو شي.
د ملي یووالي حکومت اجرايه رییس عبدالله عبدالله هم په هېواد کې د DNA معایناتو د مرکز فعالېدل د جرمونو په کشف او د عدالت په پلي کولو کې یو اغېز ناک ګام بولي.
دغه راز د عدلي طب ریاست د خدماتو د وړاندې کولو امر وايي، له هېواده بهر د DNA د معایناتو ترسره کول ډېر زیات لګښت لري؛ خو په هېواد کې دننه د دغه شان معایناتو ترسره کېدو د لابراتوار په فعالېدو سره به دغه لګښتونه تر ډېره کم شي.
افغانستان له هغو کم شمېر هېوادونو دی چې په کې د DNA معایناتو مرکز موجود نه و.
