ولسمشر محمداشرف غني د یوه فرمان له مخې، خپل مخکېني لومړي مرستیال عبدالرشید دوستم ته د مارشالي رتبه ورکړه.
د ملي مصالحې شورا لومړي مرستیال عنایتالله بابر فرهمند دغه فرمان پر خپل ټویټر خپور کړی دی.
ولسمشر غني د جوزا په ۲۱مه دغه فرمان لاسلیک کړی دی.
د فرمان په متن کې لیکل شوي: «د اساسي قانون د ۶۴مې مادې د ۱۹ بند له مخې، عبدالرشید دوستم ته د سیاسي کړکېچ د حل او په هېواد کې د ثبات راتلو په برخه کې د هغه د خدمتونو لپاره د مارشالي رتبه ورکوم.»
د هغې سیاسي هوکړې له مخې چې په ثور میاشت کې د ولسمشر محمداشرف غني او عبدالله عبدالله ترمنځ لاسلیک شوه، عبدالرشید دوستم ته د مارشالي رتبې ورکول او د دولت په ستره شورا او ملي امنیت شورا کې د ګډون حق ورکول د یادې هوکړې برخې دي.
تر دې مخکې په لومړي ځل د شاهي کورنۍ د واکمنۍ پر مهال له حبیبالله کلکاني نه د کابل نیولو له کبله شاهولي خان ته د مارشالي رتبه ورکړل شوه.
له هغه وروسته پخواني ولسمشر حامد کرزي د طالبانو پر وړاندې جبهې قوماندان احمدشاه مسعود ځایناستي محمدقسیم فهیم ته د مارشالي رتبه ورکړه.
