ملی خوفسیزلیک کینگشی نینگ ایتیشیچه، طالبان گروهی اوتگن 7 کونده 9 ولایتده کمیده 30 تینچ‌اهالی نی اولدیریب و باشقه ایکی کیشی نی یره‌لنتیرگن.
بوگون (یکشنبه 24- حمل) ملی خوفسیزلیک کینگش سوزلاوچیسی جاوید فیصل بیر توییت آرقه‌لی یازیشیچه، مذکور تینچ‌اهالیدن کوپینچه‌سی یول چیککه‌سیده‌گی ماین پارتلشی باعث هلاک ایتیلگن.
ملی خوفسیزلیک کینگش سوزلاوچیسی نینگ اورغولب ایتیشیچه، طالبان تینچ‌اهالی ضرر کورمه‌سلیگی و تینچلیک توغریسیده‌گی سعی و حرکتلر نتیجه بیریشی اوچون، آتیش کیسین اعلام قیلیشی کیره‌ک.
طالبان گروهی حاضرگچه بو توغریده فکر بیلدیرمه‌گن.
ایتیش کیره‌ک کیم، مملکتده کرونا ویروسی کینگه‌یشی بیلن حکومت طالبان گروهی‌دن نیچه مرته آتیش کیسین اعلام قیلیشی نی سوره‌دی.
اوتگن جمعه کونی 22- حمل، یمن ده ایکی هفته‌لیک آتیش کیسین اعلام ایتیلگنی توغریسیده تشقی ایشلر وزیرلیگی تامانیدن ترقه‌تیلگن اعلامیه‌ده، شونینگدیک طالبان گروهی‌دن آتیش کیسین اعلام قیلیشی سوره‌لدی.
بیراق طالبان حاضرگچه بو ایسته‌کلرگه ایجابی جواب بیرمه‌گن.
عین حالده، ملی خوفسیزلیک کینگشی طالبان محبوس‌لری نینگ اوچینچی کاروانی قوییب یوباریلگنیدن خبر بیردی.
مذکور نهاد بو باسقیچ‌ده قنچه طالب قوییب یوباریلگنی نی بیللی قیلمه‌گن. بوندن آلدین افغانستان حکومتی ایکی باسقیچ‌ده 200 محبوس نی قوییب یوبارگن ایدی.
ایکی تامان محبوس‌لری قوییب یوباریلگنیدن کیین، افغانستان حکومتی و طالبان گروهی آره‌سیده تینچلیک سوزلشووی باشله‌نیشی گه قرار قیلینگن.
