غزنی ولایتی نینگ جاغوری تومنی یشاوچیلریدن یوزلرچهسی ناراضیلیک بیر نمایشده مذکور تومن پولیس قومندانی نینگ قوریقچیلرینی ایکی عیال گه جنسی تجاوز قیلیشگه عیبلشگن.
غزنی ولایت کینگشی ده جاغوری اهالیسی نینگ نمایندهسی حسنرضا یوسفی نینگ ایتیشیچه، مذکور تومن پولیس قومندانی نینگ ایکی قوریقچیسی ایکی یاش عیال گه جنسی تجاوز قیلیش گه عیبلنیب اهالی تامانیدن قولگه آلینگن.
اعتراضچیلر تومن بناسی نینگ برابریده توپلهنیب اوشبو تومن نینگ ولسوالی، پولیس قومندانی و جنایی جرملرگه قرشی کورهش آمری وظیفهلریدن چیکلنتیریلیشینی طلب قیلیشگن.
جناب یوسفی نینگ ایتیشیچه، اعتراضچیلر تومن رسمیلرینی وظیفهلری گه نسبتن بیفرق یاندهشیش گه عیبلب و ایستکلریگه ایجابی جواب بیریلمهگن صورتده، ناراضیلیکلری گه دوام بیریشلری توغریسیده آگاهلنتیریشگن.
عین حالده، ایچکی ایشلر وزیرلیگی، جاغوری تومنی نینگ پولیس قومندانی و جنایی جرملرگه قرشی کورهش آمری ایشدن آلینگنلریدن خبر بیرگن.
ایچکی ایشلر وزیرلیگی سوزلاوچیسی طارق آرین نینگ ایتیشیچه، جاغوری تومنی نینگ پولیس قومندانی و جنایی جرملرگه قرشی کورهش آمری تدقیقات اوچون مرکزگه چقیریلگن و عیبلنگن ایکی عسکر مذکور تومنده نظارت گه آلینیب تیرگاو آستیده بولگن.
طارق آرین گه کوره، بو واقعه جدی شکلده تیکشیریلیشی اوچون مرکزدن چاغوری تومنی گه بیر هیأت یوباریلگن.
عین مده، جاغوری تومنیدن بولگن بیر منبع نینگ ایتیشیچه، ولسواللیک قوریقچیلری تامانیدن اعتراضچیلرگه قرشی آتیلگن اوق نتیجهسیده اعتراضچیلردن بیری هلاک و باشقه 2 تهسی یرهلنگن.
اوشبو موضوع توغریسیده جاغوری مسؤوللری نینگ فکرینی اورگنیش گه مؤفق بولمهدیک.
