افغانستان جمهور رئیسی محمداشرف غنی، آمریکا تشقی ایشلر وزیری مایک پمپئو بیلن ویدیویی آرقه‌لی اوچره‌شیب افغانستان تینچلیک جریانی توغریسیده صحبت قیلگن. اوشبو اوچره‌شوو اوتگن کون «دوشنبه، 12- جوزا» کیچ قورون اوتکزیلگن.
افغانستان جمهورلیک ریاست سرایی تامانیدن نشر قیلینگن خبرنامه ده یازیلیشیچه، تینچلیک توغریسیده بولگن اوچره‌شووده جناب غنی و پمپئو، افغانستان تینچلیک جریانی نینگ کیینگی قدملری جمله دن محبوس‌لرنی قوییب یوباریش، آتیش‌کیسین، افغانستانلیک‌لر ارا سوزلشوولرنی تحلیل و مکانی و باشقه تینچلیک که تیگیشلی ایریم موضوعلر توغریسیده صحبت قیلیشگن.
جمهورلیک ریاست سرایی نینگ خبرنامه‌سی اساسیده، جمهور رئیس غنی «دایمی تینچلیک و برقرارلیک‌که ایریشیش خصوصیده افغانستان حکومتی نینگ نقشه‌سینی آچیقلب» آمریکانینگ تشقی ایشلر وزیری گه ایتیشیچه، افغانستانده تینچلیک و برقرارلیک تأمین‌لنیشی توغریسیده کوپراق سعی و حرکت قیلینیشی کیره‌ک.
شونینگدیک، اوشبو اوچره‌شووده آمریکا تشقی ایشلر وزیری مایک پمپئونینگ ایتیشیچه، کابل و واشنگتن آره‌سیده‌گی استراتیژی و اوزون مدتلی علاقه دوامی اوچون آمریکا قوشمه ایالت‌لری «ایرکین، بیرلشیک، دموکراتیک و تینچ بیر افغانستان» اوچون ایش قیله‌دی.
اوشبو اوچره‌شووده جمهور رئیس غنی و آمریکا تشقی ایشلر وزیری مایک پمپئوگه علاوه، افغانستان ملی مصالحه عالی کینگشی نینگ باشلیغی عبدالله عبدالله، مذکور کینگش نینگ ایشلری و اعضالری تکمیل بولگنی توغریسیده صحبت قیلگن.
عین دمده، بو اوچره‌شوودن سونگ، افغانستان تینچلیک لایحه‌سی بوییچه آمریکانی خاص نماینده‌سی زلمی خلیلزادنینگ خبرچی‌لرگه ایتیشیچه، افغانستانلیک‌لر ارا سوزلشوولر باشله‌نیشی افغانستان تینچلیک جریانی نینگ اونملی بولیمی دیر و حاضر اوشبو جریان باشله‌نیشی توغریسیده جدی شکلده سعی و حرکت قیلینه‌دی.
بیراق، جناب خلیلزادنینگ اورغولشیچه، افغانستانلیک‌لر ارا سوزلشوولر باشله‌نیشی اوچون محبوس‌لرنی قوییب یوباریش جریانی یکونلنیشی کیره‌ک.
افغانستان تینچلیک لایحه‌سی بوییچه آمریکانی خاص نماینده‌سی، هییت کونلریده آتیش‌کیسین اعلان قیلینگنی، زوروانلیک‌لر کمه‌یگنی، هییت دن کیین اعلان قیلینمه‌گن آتیش‌کیسین دوامی و محبوس‌لرنی قوییب یوباریش جریانی تیزلشتیریلگنینی افغانستانلیک‌لر ارا سوزلشوولر باشله‌نیشی اوچون امیدوارلیک‌لرنی نشانه‌لریدن دییدی.
