بوگون (سه‌شنبه ۴- سنبله) عیاللر منطقوی ترماق اعضالریدن قطاری کابل ده خبری بیر ییغین اوتکزیب ایتیش‌لریچه، آواز قولگه کیلتیریش برابریده عیاللردن جنسی سوء استعمال قیلیش اوتگن سیلاولرده عیاللرنینگ برابریده بولگن اینگ کتته قیینچلیک‌لردن بیری دیر. مذکور ترماق اعضالری «عیاللر و سیلاوی قیینچیلیکلر» نامیده تحقیقی گزارش‌لرینی نشر قیلگن.
عیاللر منطقوی ترماق اعضاسی حمیرا ثاقب نینگ ایتیشیچه، سیلاولر ایرکین کمیسیونیده‌گی کیشی‌لردن قطاری آرقه‌لی توغری و ناتوغری شکلده عیاللردن نامشروع ایسته‌کلر بولگن.
مذکور گزارش گه کوره، سیلاولر کمیسیونی اعضالری و بو کمیسیون ایشلاوچی‌لریگه قطار عیبلاولر وارد بولگن. بیراق حجت کم‌لیگی باعث اثبات‌لنمه‌گن. مذکور ترماققه کوره، بو عیبلاولر ثابت بولگن صورتده افغانستان و دموکراسی گه ننگ لکه‌سی قالیشی ممکن.
بو گزارش اساسیده، قطار ولایت‌لرده ایرکک‌لر آواز بیریش اوچون عیاللرنینگ استیکری یا-ده کارتیدن قوللنگن و بعضن هم عیاللر ایرکک‌لرنینگ بویروغی اساسیده آواز بیریشگن و شونینگدیک قطار ولایت‌لرده ناتینچلیک باعث عیاللر آواز بیریشدن محروم قالگن.
سیلاولر ایرکین کمیسیونی نینگ دبیرخانه باشلیغی حبیب‌الرحمان ننگ نینگ سلام‌وطندارگه ایتیشیچه، بو ترماق نینگ تحقیقی گزارشی حاضرگچه اولرگه شریک قیلینمه‌گن و بو توغریده فکر بیلدیره آلمه‌یدی.
