یقین آرهده امریکالیک 4 مینگ حربی قوشین افغانستانگه یوباریلیشی کوتیلهدی. بو توغریدهگی قرار کیلگوسی هفته نینگ بیرینچی کونلریگه قدر اعلان قیلینهدی.
اما، قطار سیاسیتچیلرنینگ تعبیریچه، امریکانینگ افغانستانده حربی قوشینلری سانی آشیریلیشی مملکتده امنیت تامین بولیشی اوچون ایجابی تاثیر قیلمهیدی بلکه، منطقهوی رقابتلر کوپراق بولیشیگه شرایط یرهتهدی.
جاوید کوهستانی، خلق ارا حربی قوشینلر سانی آشیریلیشی تشویشلرنی هنوز کوپهیتیرهدی دیگن. اونینگ ایتیشیچه، خلق ارا حربیلر سانی آشیریلیشی رسمی مسکونی خواطرگه سالگن. او، ملی بیرلیک حکومتی نینگ رهبرلریدن وضعیتنی درست مدیرت قیلیشنی سورهگن.
حربی تحلیلچی عتیقالله امرخیل، حربی تحلیلچیلرهم افغانستاندهگی امنیتی قیینچیلیکنی حل قیلیش اقش حربیلری سانی آشیریلیشی بیلن ممکن ایمس لیگیگه ایشانهدیلر دیگن. فقط اقش نینگ سیاسی قدرت منطقهده کوپهیتیریلهدی دیگن امرخیل.
امرخیل، امریکالیک حربیلر سانی آشیریلیشی اوچون قنچهلیک آدیم کوتاریلمهسین، افغانستان اینگ یامان وضعیتگه دوچار بولهدی دیدی. اوشبو حربی تحلیلچی خلق ارا حربیلر سانی آشیریلگندن کوره افغان حربی قوشینلرینی کوپراق زمانوی جهازلهنیشینی تکلیف قیلگن.
امریکالیک حربی قوشینلرنی افغانستانگه یوباریلیشی نمایندهلر مجلسی نینگ ییغینیده هم بحث گه آلینگن. مجلس نینگ اعضالری، امریکا قوشمه ایالتلری تامانیدن افغانستانگه حربی قوشین یوباریلشی یالغاندن بولک نرسه ایمسلیگی اوستیده تاکید قیلگنلر. «افغانستانده خلق ارا حربی کوچلر سانینی آشیریش مملکتدهگی جاری وضعیتگه پایان بیریش اوچون حل یول ایمس» دیدی مجلس اعضالری.
مجلس نینگ بوگونکه عمومی یغینیده نطق سوزلهگن محمد سرور عثمانی فراهی، امریکا قوشمه ایالتلری افغانستان حکومتیگه بیرگن وعدهسیگه عمل قیلیشی نیتده بولسه، افغان حربی عسکرلرینی زمانوی حربی انجاملر بیلن جهازلهشی کیره ک دیگن. شونینگدیک مجلس نینگ اعضاسی، تروچیلرنینگ اصلی مرکزی پاکستانده ایلدیزدن نابود قیلینیشی اوچون رسمی اسلام آباد اقش تامانیدن سیاسی باسیم آستیگه آلینیشی خصوصیده علیحده تاکید قیلگن.
حاضرگی کونده امریکا رهبرلیگیده ناتونینگ 8500 حربیسی افغانستانده حربی ساحهده فعالیت قیلهدی. رسمی واشنگتن نینگ یوقاری مرتبهلی رسمیلری، امریکا افغانستانگه ینگی حربی قوشین یوباریش بیلن آلدینگی خطاسیگه ینه بیر بار یول قویگن بولهدی دییه اورغولهگنلر.
