جلال‌آباد افغانستان‌نینگ جمعیت‌لی و کته شهرلریدن بیری سنله‌دی و بو شهرده موتر اینیقسه رِکشالر هوانی افلاسلنتیرگن.
ننگرهارده چمه‌سی 250 کته و کیچیک صنعتی ایش‌خانه موجود و کمیده 200 ته‌سی جلال‌آباد شهری‌نینگ ایچی و اطرافیده فعالیت قیله‌دی.
سلام‌وطندار بیلن صحبت اوتکزگن ننگرهار ولایتی‌نینگ یشش محیط‌نی سقلش اداره‌سی باشلیغی فضل‌ربی همیم‌نینگ ایتیشیچه، شهر ایچیده کته و کیچیک ایش‌خانه‌لر و شرکت‌لرنینگ فعالیتی هوانی دَغل قیلیشگن.
اونینگ ایتیشیچه، برچه ایش‌خانه‌لرگه یشش محیط‌نی سقلش اوچون رهنمالیک ورق یوبارگن‌لر و اونگه اساس عمل بولیشی کیره‌ک. جناب همیم‌گه کوره، خطا کارلر بیلن قانون اساسیده یانده‌شیله‌دی.
شونینگ‌دیک، جلال‌آباد شهری‌نینگ یشاوچیلریدن بیرقطاری‌نینگ ایتیشیچه، اوشبو شهرده موتر کوپلیگی‌گه قوشیمچه شهر ایچیده فعالیت قیله‌دیگن ایش‌خانه‌لرنینگ دودی اولرنی تورلی کسل‌لیک‌لرگه دوچار قیلگن.
اولرنینگ ایتیشیچه، هوا دَغل‌لیگی یانیده، شهر ایچیده ایش‌خانه‌لرنینگ سیسی اهالینی روحی قیین‌چیلیک‌لرگه چالینتیرگن.
ننگرهار ولایتی‌نینگ صنعت و سوداگرلیک اداره‌سی باشلیغی شیرعلم امله‌وال‌نینگ ایتیشیچه، ناتینچلیک سبب ایش‌خانه‌لردن کوپینچه‌سی شهر ایچیده فعالیت قیله‌دی.
اونینگ ایتیشیچه، ناتینچلیک یانیده صنعتی پارک‌لر یکونلنمه‌گنی سبب، سوداگرلر شهر ایچیده جایلشگن‌لر.
ننگرهار ولایتی‌نینگ صنعت و سوداگرلیک اداره‌سی باشلیغی‌گه کوره، سوداگرلرنینگ خوفسیزلیگی تأمین‌لنیب و اولرنینگ برق قیین‌چیلیک‌لری حل ایتیلگن صورتده، اولر شهردن تشقری ایش‌خانه‌لرینی فعال قیله‌دیلر.
شونینگ‌دیک، داکترلرنینگ ایتیشیچه، هوا دَغل‌لیگی یوقوملی کسل‌لیک‌لر یانیده، اهالینی سرطان کسل‌لیگی‌گه دوچار قیله‌دی.
ننگرهارنینگ سرخ‌رود تومنی شیخ مصری سرکی و رودات تومنی غازی امان‌الله شهرچه‌سی یقینیده ایکی صنعتی پارکی بار و اولردن بیری بوتونله‌ی غیر فعال و باشقه بیری یریم فعالیت قیله‌دی.
