اوتگن هفته بدخشان ولایتی نینگ زیباک تومنی مرکزی جنگری طالبلر اشغالیدن ایکّی کون اوتر اوتمس جمعه‌دن شنبه‌گه اوتر کیچه‌سی طالبلر بیر نیچه ساعتلیک اوروشلردن سونگ قندوز ولایتی نینگ قلعه‌زال تومنی‌نی قولگه کیریتگن ایدیلر.
در واقع ایکّی ییل ایچیده قلعه‌زال تومنی اوچینچی مرته جنگریلر تصرفی‌گه اوته‌دی. قندوز ولایتی اهالیسی و مدنی جماعه‌چیلیک فعاللری دولت اوشبو ولایت امنیتی‌گه بی‌فرق یانده‌شگن تقدیرده قندوز مرکزینی ینه بیر مرته دولت‌گه قرشی جنگ قیله دیگن قوراللی گروهلر اشغالی‌گه اوتیشی ممکن لیگی باره‌سیده آگاهلنتیرماقده‌لر.
حاضرگی کونده بدخشان ولایتی نینگ وردوج، اشکاشم و زیباک تومنلری جنگری طالبلر اشغالیده قالماقده. دولت هلیگچه مذکور تومنلرنی آزاد ایتیش اوچون لازم چاره – تدبیرلر کورمه‌گن. فاریاب ولایتی نینگ قاوورماچ (غورماچ) تومنی مرکزی اوتگن هفته بیر نیچه ساعت جنگری طالبلر قولیگه اوتگن ایدی، اما دولت کوچلری اوشبو حدودنی جنگریلردن آزاد ایتگن لیکلری باره‌سیده خبرلر نشر ایتیلگن ایدی.
یقین‌ده فاریاب ولایتی نینگ بلچراغ تومنی‌گه قره‌شلی قورچی منطقه‌سی طالبلر تامانیدن تصرف ایتیلگن. اوشبو استراتیژیک حدود جنگریلر اشغالی‌گه اوتیشی بیلن مذکور تومن مرکزی طالبلر تهدیدیگه روپه ره بولگن.
.jpg)
شمال ولایتلری و طالبلرنینگ یازگی عملیاتی
طالبلر اوزلری‌نینگ منصوری ناملی یازگی هجوملرینی اساساً شمال ولایتلریده باشله دیلر. طالبلر نینگ اوشبو عملیاتی کیله‌سی کونلر ایچیده اوج آلیشی ممکن. طالبلر و باشقه ترورچی گروهلر کمیده اوچ ییلدن بیری افغانستان شمال ولایتی‌گه کتّه دقت اعتبار قره‌ت ماقده‌لر.
طالبلرنینگ شمالده کوپراق فعال بولیشی‌گه ایریم منطقه دولتلری اینیقسه پاکستان، روسیه و ایران رول اوینه‌یدی. مذکور دولتلر بیرینچیدن امریکانینگ منطقه‌ده‌گی نفوذینی نینگ آلدینی آلیش اوچون افغانستان حدودیده طالباننی حمایت ایتیشنی تنه‌له‌گن و بو آره طالبلرنینگ اساسی حامیسی پاکستان دولتی لازم شرطلرنی مهیا ایتماقده.
طالبلر سونگی آیلر ایچیده شمالی ولایتلر اینیقسه بغلان، قندوز، فاریاب و بدخشان‌ده تاباره کوچلنگن. قندوز، فاریاب و بغلان ولایتلری‌نینگ معین حدودی جنگریلر قولیگه اوتگن. تصدیقلنمه‌گن معلوماتلرگه قره‌گن‌ده روسیه قوشنی تاجکستان آرقلی مملکت نینگ شمال ولایتلریده طالبلرگه زمانوی قورال اسلحه‌لر ییتکزیب بیرگن.
گرچه رسمی مسکو اوشبو ادعالرنی رد قیلیب، طالبلرنی تینچلیک مذاکره‌لریگه ترغیب ایتیش همده روسیه وطنداشلرینی جنگریلر تهدیدیدن اسره‌ش اوچون بو گروه بیلن علاقه‌ده ایکنینی اعتراف ایته دی.
امریکانینگ افغانستان‌ده فعالیت آلیب باره یاتگن حربی کوچلری مملکت نینگ شمال ولایتلری وضعیتی‌نی یقین‌دن کوزه‌تماقده. بوندن آلدین امریکا بلند مرتبه‌لی رسمیلری روسیه نینگ طالبلردن حمایت ایتیشی باره‌سیده تشویش بیلدیریب افغانستان‌نی ایکینچی سوریه گه ایلنیشی‌گه رخصت بیرمس‌لیکلرینی تکرارلب کیلگنلر.
افغانستان حربی کوچلری شمال ولایتلری امنیتی‌گه بی‌فرق یانده‌شگن تقدیرده اوشبو حدود ده بیرنیچه تومنلر مرکزلری حتی که بعضی بیر ولایتلر مرکزلری جنگری طالبلر اشغالی‌گه اوتیشی احتمالی موجود. شمالده امنیتی وضعیت یامانلشیشی نینگ آلدین آلیش اوچون اوتگن ییللرده‌گی تجربه‌لردن فایده‌لنیب دولت اوشبو ولایتلرگه قوشیمچه حربی کوچلر سفر بر ایتیشی عین حالده طالبلر قرارگاهلری و مرکزلریگه هوا آرقلی هجوملر اوتکزیشی ضرور. کیینگی وقتلرده شمال ولایتلری‌نینگ بعضی بیر حدودلریده حربی کوچلرگه اوز وقتیده آزیق آوقت همده کیره‌کلی اوقلر ییتکزیب بیرلمه یاتگنی خصوصیده شکایت قیلینماقده.
شمال امنیتی نی تأمینلش اوچون چیت ایل کوچلریدن فایده لنیش کیره‌ک
شمال امنیتی‌نی مستحکملش اوچون امریکا کوچلری همکارلیگی‌نی جلب ایتیش ضرور. کیینگی هفته‌لر ایچیده افغانستان‌ده امریکا قوشمه ایالتلری نینگ حربی کوچلر سانی آشیشی کوتیله‌دی. امریکالیک قوماندانلر روسیه‌نی افغان طالبلرینی حمایت ایته باشله‌گنیدن سونگ افغانستان‌ده جدی خطر موجودلیگینی حس ایتیب رسمی واشنگتن‌دن بو مملکت‌گه قوشیمچه حربی کوچلر سفر بر ایتیشی‌نی سوره‌گنلر.
یقین‌ده امریکا حربی کوچلری‌نینگ بیر قطار اف 16 رسوملی حربی جتلرینی کابل بگرام هوا قونلغه‌سیگه کیلیب جایلشگن. در واقع ایلک بار امریکا اوشبو طیاره‌لرنی افغانستان‌گه سفر ایته‌دی.
یقین‌ده اقش جمهور رییسی دونالد ترامپ‌نی افغانستان بوییچه اوز ستراتیژیسی‌نی اعلان ایتیشی هم کوتیله‌دی. ترامپ مأموریتی اوچون منطقه‌ده ترورچیلرنی نابود ایتیش بیرینچی اورینده توره‌دی. بو مسئله‌نی نظرده توتگن حالده اقش حربیلری کیله‌جکده افغانستان‌ده ترورچیلرگه قرشی حربی فعالیتلرده امکان قدر جدی یانده‌شه دیلر.
بو آره ده رسمی کابل مذکور کوچلردن ترورچیلیککه قرشی کوره‌ش‌ده اونوملی روش‌ده فایده‌لنیشلری درکار. عین حالده افغانستان حربی کوچلرینی زمانوی قرال اسلحه‌لر بیلن جهازلنتیریش اینیقسه افغانستان هوا کوچلری قسمینی حربی طیاره‌لر و باشقه کیره‌کلی حربی امکانلر و کادرلر بیلن تأمینلب باریش اوته ضرور.
افغانستان رهبریتی مملکت حربی کوچلرینی زمانوی قورال اسلحه‌لر بیلن جهازلنتیریب اولرنینگ حربی قابلیتی‌نی آشیریش اوچون اینگ اولا دونر دولتلر خواهش ایستکلرینی بجا کیلتیریشی لازم. او هم بولسه ملی کوچلر ارگانلریده فسادنی یوق قیلیش‌دن عبارت.
حاضرگی کونده مذکور ارگانلرده فساد اوج آلگنی افغان ملی کوچلری‌نینگ حربی قابلیتی‌نی پسه‌ییشی گه آلیب کیلگن. یقین‌ده افغانستان جمهور رییسی محمد اشرف غنی ایچکی ایشلر وزیرلیگی‌نی فساد مرکزیگه ایلنگنینی اشاره قیلیب اوشبو وزیرلیگیده کیلیب چیقیشی یگانه قومدن بولگنلر سانی کوپ لیگینی تنقید ایتگن ایدی.
در حقیقت افغانستان حربی کوچلرینی حقیقی طرزده ملی کوچگه ایلنتیریش اوچون اوشبو ارگانلر رهبریتی و صفلرینی افغانستان اهالیسینی تشکیل ایته دیگن تورلی قوملر و ایلاتلر نماینده‌لریدن عبارت بولگن شخصلر بیلن تولدیریش درکار. بو مسئله نینگ اوزی هم امنیتی کوچلر قابلیتی نینگ آشیشی و یا هم ضعیف لشیشی گه توغریدن – توغری تأثیر اوتکزه‌دی.
