.jpg)
جمعه کونی بلخ ولایتی مرکزیده شاهین 209 قول اردوسی مسجدیده اویوشتیریلگن ترور هجومی افغانستان دولتی و خلقی قاله بیرسه مملکتده ترورچیلیککه قرشی فعالیت آلیب باره‌دیگن خلق ارا حربی کوچلرگه جدی بیر پیغام بیردی. در حقیقت اوشبو واقعه افغانستان حربی کوچلرینی ترور فعالیتلری نینگ آلدینی آلیشده هلی ییترلی قابلیت و امکانیتلرگه ایگه بولمه‌گنی شونینگدیک مذکور حربی کوچلر رهبریتی اوز مسوولیت و بورچلرینی درست بیر شکلده بجره آلمه یاتگن‌لیکلرینی اثباتلب بیردی.
باشقه بیر تامانده اوشبو حادثه خلق ارا ترور مرکزلری و ترماغلرینی نه قدر فعال و ینگی تکتیک‌لر ایشلب چیقیب عملگه آشیره یاتگن‌لیکلرینی ینه بیر مرته نمایان قیلدی.
گرچند افغانستان بویلب شاهین 209 قول اردوسیده یوز بیرگن ترور حرکتی افغان حربی کوچلرینی نابود ایتیش اوچون عملگه آشیریلگن اوزیگه خاص ترور هجومی بولمسه-ده، انسانی تلفات نقطه نظریدن مثلی کم کوریلگن واقعه ایدی. رسمی معلوماتلرگه کوره اوشبو حمله‌ده 135 کیشی‌دن آشه حربیلر شهید بولگن و 100 دن آشه راق حربیلر تن جراحتی آلگنلر.
ترورچیلرنی اردونینگ موترلری و اردو عسکرلری‌گه خاص حربی کییم‌لردن فایده‌لنیب شاهین 209 قول اردوسی نینگ جامع مسجدی‌گچه کیریب باریشگه مؤفق بولگن‌لیکلری عادی گینه بیر ترور عملیاتی ایمس البته. اوشبو عملیات انچه وقتلردن بیری پلانلشتیریلگن بولیب اونده قول اردو قرارگاه‌سی ایچکریسیدن بیر نیچه کیشینی اولر بیلن همکارلیک قیلگن بولیشلری ممکن.
.jpg)
حربی قرارگاه‌لر ایچکریسی‌گه کیره آلیش آسان ایش بولمه گنینی همه بیله‌دی. هجومچیلرنی قنده‌ی قیلیب قول اردو ایچکریسی‌گه کیریب باریشگه اولگورگن‌لیکلری جدی سوال توغدیره‌دی. قول اردو نینگ دروازه سیده‌گی وظیفه‌دار قراووللر قول اردونینگ قیسی موترلری و منصبدارلری قرارگاه‌دن تشقریده بولگن‌لیکلری باره‌سیده بیران نرسه بیلمس میکنلر؟
نیگه ترورچیلر اردو کییمی‌ده قوراللنگن حالده سینچکاولیک بیلن تیکشیریلمه‌گنلر؟
و شونگه اوخشه‌گن باشقه بیر قطار سواللر هر بیر کیمسه نینگ ذهنی‌نی مشغول قیلیشی طبیعی بیر حال.
کشف و امنیت ارگانلری نینگ ضعیف عمل قیله یاتگن‌لیکلری، ترورچیلرنینگ حربی ارگانلر مرکزلری‌گه رخنه سالیش گه قادر بوله یاتگن‌لیکلری افغانستان دولتی‌نی مسئله‌گه اوته جدی یانده‌شیشی‌نی طلب قیله‌دی.
اینگ اولا اردو، پولیس و باشقه امنیت ارگانلری‌گه خذمت‌گه کیره‌دیگن شخصلر لازم درجه‌ده تیکشیریلیب امنیتی فلترلردن اوتکزیلیش‌لری اوته ضرور. ایکینچیدن کشف ارگانلری فعاللری اوز فعالیتلری میزانینی بیر نیچه برابرگه آشیریب باریشلری‌گه جدی احتیاج سیزیله‌دی.
طالبلر و باشقه ترورچی گروهلر بیلن همکارلیک قیلگن شخصلر تیرگاو قیلینیب اولرنی جزالنتیریش ضرور. عین حالده کشف و امنیت اداره‌لری ایشچی‌لری اوچون مملکت ایچکریسی و تشقریسیده افغانستان حمایت ایتووچی دولتلر اینیقسه ناتو اعضا مملکتلر متخصصلری تامانیدن ایریم ساحه‌لرده اینیقسه کشف و امنیت بوییچه قیسقه مدتلی سیمینارلر اوتکزیب توریش کیره‌ک.
امنیت ارگانلری باشقروویگه جدی اعتبار قره‌تیش کیره‌ک
امنیت ارگانلری باشقرووی و رهبرلرینی المشتیریش هم باشقه بیر اساسی مسئله. مملکت امنیت اداره‌لریده تورلی شکل‌لرده فساد موجودلیگی هم اوشبو ارگانلر قابلیتی‌گه کته نقصانلر ییتکزه یاتگن بولیشی ممکن. بو نرسه مذکور ارگانلر رهبریتی قابلیتی ضعیف‌لنیشی‌گه سلبی تأثیر اوتکزه‌دی.
انه شو باعث دولت بلند مرتبه‌لی رسمیلری اوچون حکومت نینگ امنیت ارگانلری رهبریتی‌نی قیته کوریب چیقیشلریگه احتیاج توغیله‌دی. مسوول شخصلرنی اردو، پولیس، کشف و استخبارات اداره‌لریده اوز وظیفه و مسوولیتی‌نی درست بیر شکلده بجریشده غفلت کورستیش هم شاهین 209 قول اردوسیده یوز بیرگن حادثه‌لر کبی دهشتلی واقعه‌لر تکرارلنیشی گه آلیب کیله‌دی.
هلیگچه اردو، پولیس و کشف ارگانلریده مجازات و مکافات حقیقی معناده تطبیق ایتیلمه و یا هم ناقص و نا توغری بیر شکلده عملگه آشیریلگن. ایریم حاللرده اوز مسوولیتی‌نی یخشی بجره آلمه‌گن منصبدارلر یوقاری لوازملرگه کوتریلگنلر، اما مملکت منفعتی اوچون فدایی‌لیک قیلگن مینگلب شخصلر هر دایم نظرلردن چیتده قالگنلر. طبیعی که بونده‌ی بیر وظعیت امنیت ارگانلری قابلیتی‌نینگ ضعیف‌لشیشی‌گه آلیب کیله‌دیگن اساسی عامل‌لردن سنه‌له‌دی. دولت‌نینگ بیرینچی درجه‌لی مسوول شخصلر و بلند مرتبه‌لی عملدارلرینی امنیت اداره‌لری جمله‌دن اردو، پولیس و استخبارات ارگانلری رهبریتی و یوقاری مرتبه‌لی منصبدارلری هیئتی حقیقی معناده ملی بولیشی باره‌سیده هم جدی اعتبار قره تیشلری لازم. بیز بو خصوصده جماعه چیلیک آره‌سیده کم راق اعتبار قره‌تیلگنی و یا هم اصلا اعتبار قره تیلمه یاتگنی باره‌سیده شکایتلر قیلینه یاتگنی‌گه گواه میز.
دشمن دن اوچ آلیش ضرورتی
افغانستان دولتی و خلقی دشمنلری هر دایم اوچ آلیب کیله‌دیلر. بوندن بیر هفته آلدین امریکا حربی‌لری "آنه بمب" دیب اتلووچی اینگ کوچلی بمب بیلن مملکت شرقیده داعش جنگریلری مرکزینی نشانگه آلگن ایدی. مذکور حمله‌ده داعش جنگریلری‌گه کته تلفات ییتیب حربی قرارگاه‌لری ویران قیلینگن ایدی. دشمن‌نی شاهین 209 قول اردوسیده عملگه آشیرگن هجومی‌نی اچین‌ده عملگه آشیریلگن هوا عملیاتی‌نی اوچینی آلیش‌دن بولک نرسه ایمس‌لیگی‌نی توشینیش ممکن.
افغانستان حربی کوچلری هم جنگری طالبلر، داعش و یا باشقه ترورچی گروهلر حمله‌لری‌گه جواباً اولرگه قرشی عملیاتلر اوتکزیشی کیره‌ک. عکس حالده دشمن نینگ هر قنده‌ی ترور هجوملرینی قره‌لش بیلن کفایه‌لنیش ترورچی‌لرگه کوپراق جرئت بیره‌دی و افغانستان خلقی نینگ دولت و ملی کوچلرگه نسبتاً ایشانچ و اعتماد درجه‌سینی کمه‌یتیریب باره دی. مملکت حربی کوچلری شاهین قول اردوسیده عملگه آشیریلگن ترور حمله‌سی اوچینی آلیش اوچون تیز آره‌ده شمال ولایتلری بویلب دشمن نینگ اساسی قرارگاه‌لریگه ضربه‌لر بیریش‌لریگه جدی احتیاج سیزیله‌دی. بو خصوصده دولت ناتو اینیقسه امریکا حربی کوچلری حمایتی جلب ایتیشی ضرور.
