هرات ولایت کینگشینینگ باشلیغی کامران علیزایی قماققه محکوم بولگنیدن ایکی هفته اوتهدی و نتیجهده بوگون اونینگ طرفدارلریدن یوزلب کیشی ناراضلیک نمایش یولگه قوییب هرات-اسلام قلعه و هرات-تورغندی قتناو یوللرینی ترافیک یوزیگه یاپگنلر .
باشکینت کابلده اداری فساد و آغیر جرملرگه قرشی کورهش عدلی وقضایی مرکزی، ایکی هفته آلدین، هرات ولایت کینگشینینگ باشلیغی کامران علیزایینی وظیفهوی صلاحیتلریدن سوء استعمال قیلگنلیککه عیبلب ایکی ییل و آلتی آی قماققه محکوم قیلدی.
کامران علیزایی گه قرشی حکم هرات یشاوچیلری و اسلام قلعه-تورغندی بندرلرینینگ اطرافیدهگی اهالینینگ ناراضیلیکلریگه سبب بولدی . هرات ولایت کینگشینینگ باشلیغیگه قرشی اعلان ایتیلگن حکم بیکار قیلینیشی اعتراضچیلرنینگ اساسی طلبلری بولگن. اعتراضچیلرنینگ ایتیشلریچه، علیزاییگه قرشی اعلان ایتیلگن حکم بیکار ایتیلمهگن صورتده، ناراضیلیک نمایشلریگه دوام بیریشلری خصوصیده، آگاهلنتیرگنلر.
هرات ولایت کینگشینینگ باشلیغی کامران علیزایی وظیفهوی صلاحیتلریدن سوء استعمال قیلیشگه عیبدار تانیلگن.
عین حالده، اعتراضچیلرنینگ آرهسیده حضور کیلتیرگن هرات ولایت کینگشی باشلیغی کامران علیزایینینگ ایتیشیچه، مرکزدهگی کیشیلر، او، هراتده بولگن صورتده، شخصی منفتلرینی خطرگه کورهدی و شو یوزدن اونی چیکلنتیریش اوچون سعی و حرکت قیلهدیلر.
هرات ولایت کینگشینینگ باشلیغی، حکومتنی ایش سیزلیککه عیبلب آگاهلنتیریشیچه، اونگه قرشی زورهوانلیکلر دوام ایتگن صورتده، هرات ولایتیدهگی ناتینچلیکلر سببی و حکومت رسمیلرینینگ ایش سیزلیکلرینی فاش ایتهدی.
هرات حاکمی سوزلاوچیسی جیلانی فرهادنینگ ایتیشیچه، اولر، اعتراضچیلرنینگ ایستکلرینی مرکزی حکومتگه ییتکیزهدیلر.
بو موضوع توغریسیده، مملکت باش محکمهسینینگ فکرینی اورگهنیش اوچون علاقه قوردیک، بیراق کیینمه کیین قونغیراق بیلن باش محکمه رسمیلری، جواب بیریشگه حاضر بولمهدیلر.
