بوگون ارزگان ولایتی نینگ مجلسده‌گی اعضاسی عبیدالله بارکزی نینگ خبری انجمن آلیب ایتیشیچه، اوتگن کیچه ارزگان مرکزی ترینکوتده اردو کوچلری نینگ بیر پوسته‌سی سقوط قیلگن. او، امنیتی کوچلر و طالبلر اورته‌سیده روی بیرگن توقنه‌شووده، 26 کیشی اردو کوچلریدن اولدیریلگن و باشقه 17 ته‌سینی طالبان گروهی اوزلری بیلن بیرگه آلیب کیتگنلر.
بو مجلس اعضاسی نینگ ایتیشیچه، دولت نینگ ارزگانده حاکمیتی اوته ضعیف بولگن، حکومت تیزلیکده بوباره‌ده بیر ایش قیلمه‌گن صورتده عادی خلق بدبخت بوله‌دی دیب آگاهلنتیره‌دی.
صمد ناملی پوسته 8 آیدن بیری طالبلر قمراویده ایدی، نهایتده اوتگن کیچه سقوط قیلدی دیدی ارزگان امنیتی رسمیلری.
بیراق ارزگان والیسی نینگ سوزلاوچیسی دوست محمد نایاب نینگ ایتیشیچه، شوحاضر هم ساحه‌ده اوروش جریانی بار.
نایابگه کوره، بوگونکی امنیتی کوچلر و طالبلر اورته‌سیده روی بیرگن اوروش نتیجه‌سیده اردو کوچلریدن 3 کیشی و طالب‌لردن 11 ته‌سی اولدیریلگن. او، محلده ینگی امنیتی کوچلر یوباریلگن و تیزلیکده وضعیت عادیله‌شیشی ممکن دیدی.
طالب‌لرنینگ مملکت جنوبیده‌گی سوزلاوچیسی قاری یوسف احمدی نینگ ایتیشیچه، ارزگان مرکزی ترینکوت یقینیده‌گی خرما ناملی منطقه‌ده ایرلشگن اردو کوچلری نینگ پوسته‌سی طالبلر قولیگه توشگن و برچه حربی جهازلرنی طالبلر اوزلری بیلن بیرگه آلیب کیتگن.
بوباره‌ده قندهارده‌گی اردو رسمیلر نظرینی آلیشگه تلاش قیلدیک، بیراق تلاشلریمیز نتیجه بیرمه‌دی.
