اوتگن هفته سهشنبه کون کابلنینگ دارالالمان عمومی یولیده قانلی پارتلش صادر ایتیلگن ایدی. 25 کیشی قربان بولگن و 70 انسان آغیر و یینگیل تَن جراحتی آلگن بو قانلی واقعه مسوولیتینی قوراللی طالبلر ذمهسیگه آلدی.
لیکن، حادثهدن بیر کون سونگ عالی تینچلیک کینگشی نینگ مصلحتچیسی خبری بیر ییغینده طالبلرنی فرشتهلر و مقدس دییه تیلگه آلدی. او، صحبتلری جریانیده داکترنجیبنی جانی و خائن، مملکت ملی قهرمانی احمدشاه مسعودنی بغاوتگر و یرهش شهدی برهانالدین ربانینی ایسه افغانستاندهگی موجود بوتون قیینچلیکلرنینگ سببچیسی دیگن.
بو سوزلر جدی عکس صدالرگه روپه ره بولدی. افغانستان اسلامی جمعیت حزبی نینگ اجراییه باشلیغی و بلخ ولایتی نینگ سرپرستی عطامحمد نور، جناب مجاهدنی بیگانهلر خذمتچیسی دیب اونی قولگه آلینیشینی سورهدی. یونس قانونی و احمدضیا مسعودلر هم عالی تینچلیک کینگشی مصلحتچیسینینگ بو سوزلرینی جدی قارهلهدیلر.
جمهور رییسلیک سرایی بیر اعلامیه نشر قیلیب: «افغانستان دولتی هیچ بیر کیشیگه سوز ایرکین لیگینی سوءاستعمال قیلیب، یورتداشلریمیز اینیقسه خاتین – قیزلر و بالهلرنی اولدیریب مقدس ییرلرنی هجوم آستیه آلگن شخصلرنی فرشتهلر دییه خطاب قیلیشی اوچون رخصت بیرمیدی» دیگن.
مذکور اعلامیهده حرمتسیزلیک و افغانستان رهبرلری و ملی شخصیتلرگه گستاخلیک قیلیب هیچ زمان قبول ایتیله دیگن موضوع ایمس حکومت مسالهنی تیکشیریب و نتیجهنی خلق بیلن شریک قیلهدی دییلگن.
«یاتلرنینگ بویروغی بیلن هرکون اونلب گناهسیز انسانلرنی اولدیره دیگن ترورچی گروهلر مملکتنی ویران قیلیش و ترورچیلیک فعالیتلرنی بجیریش بیلن یرهش لایحهسیگه کیره آلمیدی بل اولرنابود بولیشلری حقلی» دییلگن اعلامیه نینگ بیر قسمیده.
شونینگدیک جمهور رییسلیک سرایی خلقدن بیگانهلرنینگ میش – میشی آرتیدن کیتمی اهالی نینگ ملی بیرلیگیگه زیان ییتیش اوچون سعی وحرکت قیلمسلیکلرینی سورهگن.
عبدالحکیم مجاهدگپلرینی مملکت ملی منفعتلریگه ضد دیگن مدنی فعاللر حکومتدن تیزلیکده اونی قولگه آلیشنی سورهگنلر.
مدنی فعاللردن بیری آصف همراز نینگ سلاموطندارگه بیرگن صحبتیده ایتیشیچه، جناب مجاهدنینگ بو سوزلری دشمن تیگیرمانیگه سوو قوییشدن بولک نرسه ایمس. او، حکومت بوندهی انسانللرنی قولگه آلیشی کیرهک دیدی.
شونینگدیک مجاهد کبی انسانللرنی بوندهی سوزلری افغان ملی کوچلری روحینی کوچسیز ایتیب مملکت وضعیتینی بوندن کوره یامان ایتهدی دیگن مدنی فعاللر. عین حالده، باشقه مدنی فعال بوندهی شخصیتلرنینگ عالی تینچلیک کینگشیده بولیشی ملی بیرلیک حکومتی اوچون ییریک بیر ننگ دیگن.
