افغانستان تینچلیگی بوییچه آمریکا خاص نمایندهسی زلمی خلیلزاد نینگ ایتیشیچه، قطرده طالبان سیاسی دفتری اورینباسری ملاعبدالغنی برادر بیلن اوچرهشیب، قطار موضوعلر جملهدن افغانستانلیکلرارا سوزلشوولر آلغه کیتیشی نی سورهگن.
اوتگن کیچه (پنجشنبه 18- ثور) جناب خلیلزاد بیر توییت یازیب ایتیشیچه، ملابرادر بیلن اوتکزگن سوزلشوویده، زوروانلیک کمهیتیریلیشی و افغانستانده کرونا ویروسی نینگ یخشی مدیریت قیلیش اوچون آتیش کیسین برقرار ایتیلیشی، ایکی تامان محبوسلری قوییب یوباریلیشی، افغانستان تینچلیک پروسهسی توغریسیده دنیا و منطقه حمایتی نی قولگه کیلتیریش و افغانستانلیکلرارا سوزلشوولر باشلهنیشی اوستیگه صحبت اوتکزگن.
شونینگدیک بوندن آلدین، افغانستان حکومتی طالبلردن زوروانلیک نی کمهیتیریش و کرونا ویروسی گه قرشی کورهشیش اوچون آتیش کیسین اعلام قیلیشی نی سورهگن ایدی.
(دوشنبه کونی 15- ثور) جمهوررئیس سوزلاوچیسی صدیق صدیقی خبر بیر ییغین آرقهلی، انسان دوستلیک آتیش کیسین افغانستان اهالیسی و حکومتی نینگ ایستهگی دیب ایتیشیچه، طالبان اهالی نینگ بو ایستهگی نی قبول قیلیب و زوروانلیکلرنی دوام بیریشدن قول تارتیشلری کیرهک.
شونینگدیک آمریکا خاص نمایندهسی نینگ کوپهیتیریشیچه، بو اوچرهشووده آمریکا یشاوچیسی «مارک فریریچس» قوییب یوباریلیشی حقیده ملابرادر بیلن سوزلهشیلگن.
اوتگن ییل دلو آییده، آمریکالیک بیر قراردادی ایشلاوچی فریریچس، خوست ولایتیدن اوغیرلندی. اوشه پیت آمریکالیک رسمیلردن قطاری نیوزویک هفتهلیگیده صحبت بیریب، بو کیشی حقانی ترماغی آرقهلی اوغیرلنگنی نی بیلدیرگن ایدی.
خلیلزاد بو اوچرهشوودن کیین اوتگن کون هند کیتگن. اونینگ ایتیشیچه، هند و پاکستان تامان سفر قیلگنیدن کیین ینهده ملابرادر بیلن اوچرهشی ممکن.
عین حالده، هند تشقی ایشلر وزیرلیگی بیر خبرنامه ترقهتیب ایتیشیچه، زلمی خلیلزاد افغانستان تینچلیگی توغریسیده مذکور مملکت نینگ تشقی ایشلر وزیرلیگی و ملی خوفسیزلیک مصلحتچیسی بیلن سوزلهشگن.
زلمی خلیلزاد هند دن کیین پاکستان سفر قیلیب و او ییرده، پاکستان رسمیلری بیلن افغانستان تینچلیک پروسهسی توغریسیده سوزلهش اوچون قرار قیلگن.
