میدان وردک ولایتیده طالب‌لر و حزب اسلامی اورته‌سیده بولیب اوتگن توقنه‌شووده 3 کیشی هلاک و باشقه 5 کیشی یره‌لنگن.
جلریز تومنی نینگ باشلیغی نقیب‌الله حیدری نینگ سلام‌وطندارگه ایتیشیچه، حزب اسلامی محلی قومندانی فیض‌الله و طالب‌لر محلی قومندانی نعمت‌الله کوچلری ارا بولیب اوتگن اوروشده 2 کیشی حزب اسلامی و بیرکیشی طالب‌لردن اولگن و3 کیشی حزب اسلامی اعضالریدن و 2 کیشی هم طالب‌لردن یره‌لنگن.
جلریز تومنی باشلیغی‌گه کوره، اوتگن کون (یک‌شنبه) تونقه‌شوو باشلنگن و حاضرهم دوامی بار. حیدری نینگ معلوم قیلیشیچه، اوروش جلریز تومنیده طالب‌لر فعالیتی حزب اسلامی‌گه تیگیشلی شخص‌لر تامانیدن توخته تیش بیلن باشلنگن.
جلریز ولسوالی‌گه کوره، مذکور توقنه‌شووده ایکی تامان هم اینگیل و آغیر قورال اسلحه دن استفاده قیلگن.
حاضرگه قدر توقنه‌شوو تامانلری رسانه‌لرگه بیرنرسه دیمه گنلر.
حادثه شو پیتده روی بیرگن که گلبدین حکمتیار رهبرلیگی‌ده حزب اسلامی هیأتی اوچینچی مرته افغانستان دولتی بیلن تینچ‌لیک قیلیش سوزلشوولرینی اوتکزماقده.
بوندن آلدین حزب اسلامی هم افغانستان حکومتی‌گه قرشی گروه‌لردن بیری بولگن ایدی و حاضر مذکور گروه رهبری شرط‌لر قویشی بیلن تینچ‌لیک لایحه‌سینی قبول قیلماقده.
