گزارش‌لرده اوتگن کون کیچکی وقت قوراللی طالبلرنینگ رهبری ملااخترمحمد منصور امریکه‌نینگ اوچوچی‌سیز باشقریله‌دیگن حربی طیاره‌لری نینگ بیرگن ضربه‌سی نتیجه‌سی‌ده اولدیریلگنی معلوم قیلیندی.
سلام‌وطندار ترماغی بیلن صحبت قیلگن بیر قنچه افغانستانلیک سیاسی تحلیلچی‌لر، ملا منصور اولدیریلیشی بو حرکت ایچی‌ده قرمه – قرشی لیک‌لر کوپه‌یشی‌گه سبب بوله‌دی دیگن‌لر.
پاکستانلیک سیاسی تحلیلچی ینه خبرچی رزاق برق، جنگری طالبلرنینگ رهبری کویته‌نینگ بلوچستان منطقه‌سی‌گه قره‌شلی 100 مترلیک‌ده اولدیریلگن دیگن. عین حالده، بو خبرنی قوراللی طالبلر تامانی رد قیلگن و پاکستان حکومتی ایسه بو توغریده جیم تورگن.
سیاسی تحلیلچی‌لردن محب شریف، ملا منصور اولدیریلیشی بو حرکت فعالیت‌لریگه سلبی تاثیر قویه‌دی دیدی. جناب شریف، جنگری طالبلر رهبری اولدیریلیشی بو حرکت ایچی‌ده‌گی قوماندانلر اورته‌سی‌ده ضدیت‌لر آشیشی احتمال‌دن ییراق ایمس‌لیگی باره‌سی‌ده تاکیدله‌گن.
طالبلرنینگ سابق رهبری ملا عمر وفاتی اعلان ایتیلگن‌دن کیین، بو حرکت‌نینگ بیرقنچه بلند مرتبه‌لی رسمی‌لری ملااخترمحمد منصورنی طالبان حرکتی رهبری ایتیب تعین قیلگن ایدیلر.
ملا منصور طالبلر رهبری ایتیب تعین‌له‌نیشی بیلن اونگه نسبتن مخالفت‌لر باشلنگن ایدی و اوشندن بیری بو حرکت ایچی‌ده ضدیت‌لر النگه‌سی سونمه‌گن.
محب شریف‌گه کوره، ملاعمر اوغلی ملامحمدیعقوب و اوگی ایناغه‌سی ملامنان‌لر اورته‌سی‌ده مهیا بولگن ائتلاف‌دن اونچه وقت اوتمه‌گن بولسه – ده، بو حادثه اوشبو ائتلاف اورته‌دن کیتیشی گه سبب بوله‌دی. ملاعمرنینگ اوغلی و اوکه‌سی نیمه اساسی‌ده ملا منصور بیلن بیر قول بولگن‌لیکلری هنوزگچه هم انیق بولمه‌گن.
جنگری طالب‌لرنی یامان وضعیت‌ده قالگن‌لیک لرینی بیلدیرگن جناب شریف، بو حرکت ایچی‌ده باشقه نیچه تنظیم وجودگه کیلیب، بیر – بیراو لرینی قتغن قیلیش‌لری هم ممکن دیگن.
سیاسی و حربی تحلیلچی کابل‌خان تدبیر، ملامنصور اولدیریلیشی جنگری طالبلر حرکتی‌گه جدی شکل‌ده سلبی تاثیر قوییشی اوستی‌ده اورغوله‌گن. جناب تدبیرنینگ سوزلریگه قرهگنده، طالبلر رهبری اولدیریلیشی بو حرکت‌نینگ حکومت برابریده بولگن بوزغینچی‌لیک فعالیت‌لری عمل‌گه آشیریلیشی اوچون سلبی ثایر قالدیریش معلوم گپ.
اوتگن ییل دسامبر آیی‌ده قوراللی طالبلر ایچی‌ده یوز بیرگن توقنشوولرگه اشاره قیلگن سیاسی تحلیلچی، اوشبو واقعه‌لردن سونگ ملامنصورگه عاید هیچ بیر صورت یا – ده ویدیو ترقه تیلمه‌گنلیگی ملا منصور هم ملا عمر کبی اولدیریلگنی بولیشی هم امکان دن اوزاق ایمس دیگن.
اونینگ ایتیشیچه، جمهور رییس‌غنی قطر سفر قیلیشی بیلن ملا منصور اولدیریلیشی توغریسی‌ده‌گی خبر نشر ایتیلیشی تینچلیک مذاکره‌سینی هم معماگه روپه ره قیله‌دی.
عین حالده، قوراللی طالبلرنینگ سابق قوماندانلریدن سیداکبرآغا، ملا منصور اولدیریلیشی بیر پروفاگنددن بولک نرسه ایمس دیگن. او، بو خبر توغری بولگن حالده هم، جنگری طالبلرنینگ فعالیتی‌گه هیچ قنده‌ی سلبی تاثیر قویمی‌دی دیدی.
طالبان حرکتی‌نینگ اوشبو سابق قوماندانی، امریکه نی افغانستان واقعه‌سی‌ده شکست گه روپه ره دیب، ملا منصور اولدیریلیشی توغریسی‌ده‌گی پروفاگند بیلن امریکه اوزینی دنیا آلدی‌ده موفق سیزدیره دی دیگن.
ملاعمرگه یقین شخص‌لردن بیری ملامنصور قیسقه مدت قوراللی طالبلر حرکتی‌نی رهبرلیک قیلدی. او، میلادی 60- ییل‌ده قندهار ولایتی‌ده دنیاگه کیلگن.
قوراللی طالبلر تیزیمی قوله تیلگن‌دن کیین او بو حرکت‌نینگ قندهار ولایت والی‌سی ایتیب تعین لندی. 56 یاشی‌ده بولگن ملامنصور طالبان تیزیمی‌ده هوا یوللر وزیری اولراق وظیفه بجرگن.
شونینگ‌دیک بیر لشگن ملت‌لر تشکیلاتی‌نینگ حساباتی‌گه قرهگنده، مخدر ماده لرنی قاچاق ایتیش‌ده اونینگ اساسی رولی هم بولگن.
