.jpg)
بوگون «جمعه» ایرته‌لب بامداد چاغی، قورال‌لی طالب‌لر قندوز مرکزی و بیش تومنی اوستیگه هجوم اویوشتیرگن؛ بیراق نیچه ساعت‌لیک توقنه‌شوودن کیین، امنیتی کوچلر اولرنینگ هجومی‌نی دفع ایتگن.
قندوز ولایتی‌نینگ امنیه قومندانی جنرال محمدقسیم جنگل‌باغ نینگ سلام‌وطندارگه ایتیشیچه، دولت‌گه قورال‌لی عصیانچی‌لر قندوز شهری‌نینگ مرکزی‌گه تیگیشلی تلوکه و چرخاب منطقه‌لری و شونینگ‌دیک علی‌آباد، چهاردره، خان‌آباد، دشت ارچی و امام صاحب تومن‌لری اوستیگه هجوم اویوشتیرگن.
جنرال جنگل‌باغ نینگ ایتیشیچه، بو هجوم‌گه قرشی امنیتی کوچلر نیچه تاماندن طالب‌لرنینگ اوستیگه هجوم اویوشتیرگن و طالب‌لرنی مغلوب قیلگن. اونینگ کوپه‌یتیریشیچه، اوشبو توقنه‌شووده قورال‌لی طالب‌لرگه آغیر زیان ییتکیزیلگن.
دیمک حاضرگچه قندوز شهری‌نینگ شرقی دروازه‌سی چرخاب منطقه‌سیده امنیتی کوچلر بیلن طالب‌لرنینگ اورته‌سیده توقنه‌شوو دوام ایتماقده. ایتیلیشیچه، چهاردره تومنی‌ده هم قتیق توقنه‌شوو یوزبیریب کیله‌یاتگن. چهاردره ده محلی پولیس مدیری قومندان گل‌محمدنینگ ایتیشیچه، امنیتی کوچلر قورال‌لی طالب‌لرنی آرقه‌گه چیکیلتیریش‌گه مؤفق بولگن.
قندوز امنیه قومندانی‌نینگ ایتیشیچه، مذکور ولایت‌نی برچه تومن‌لریده ینگی امنیتی کوچ یوباریلگن.
باشقه تاماندن، قورال‌لی طالب‌لر بوگون ایرته‌لب خان‌آباد تومنی چهار سری منطقه‌سیده قندوز- تخار قتناو یولی‌نی بیر ساعت یاپگن ایکن، جنرال جنگل‌باغ‌گه کوره، اوشبو قتناو یول قیته‌دن امنیتی کوچلر تامانیدن آچیلگن.
