.JPG)
غزنی ولایتی‌نینگ امنیه قومندانی جنرال امین‌الله امرخیل‌نینگ سلام‌وطندارگه ایتیشیچه، غزنی ولایتی کینگ‌لیک و ارزش لحاظی‌دن بیرینچی درجه‌ده قرار تاپگن ولایت‌لر جمله‌سیدن سنله‌دی، بیراق مذکور ولایت‌نینگ انشاعاتی و پولیس تشکیلاتی اوچینچی درجه‌لی ولایت‌لر قطاریده بولگن.
اوتگن بیر آی جریانیده، غزنی امنیه قومندانلیگی‌نینگ 228 بَستی ایچکی ایشلر وزیرلیگی تامانیدن بوشه‌تیلگن. حاضر غزنی امنیه قومندانی‌نینگ ایتیشیچه، امنیتی اداره‌لرنینگ پست‌لری بوشه‌تیلیشی دوام ایتیب و مرکزی حکومت غزنی‌ده‌گی موجود پولیس‌دن حمایت قیلمه‌گن صورتده، مذکور ولایت سقوط قیله‌دی.
غزنی ولایتی‌نینگ امنیتی یخشی‌لنیشی خصوصیده امنیه قومندانلیگی تامانیدن تکلیف بولینگن ریجه‌لر توغری‌سیده جناب امرخیل‌نینگ ایتیشیچه، اوشبو ریجه‌لرنی برچه‌سی ایچکی ایشلر وزیرلیگی تامانیدن رد ایتیلگن و هیچ بیر اداره بونی نتیجه‌سیگه دقت قیلمه‌گن.
غزنی امنیه قومندانی‌نینگ ایتیشیچه، ولایت سقوطی بیلن بدنام بولیش‌نی ایستمه‌یدی و اوشبو دقت‌سیزلیک‌لر دوام ایتگن صورتده، حربی تشکیلاتی‌ده وظیفه بجریش‌دن وازکیچیش‌گه مجبور بوله‌دی.
غزنی ولایتی‌نینگ امنیتی یمانلیگی توغری‌سیده جناب امرخیل‌نینگ ایتیشیچه، ناوه تومنی 8 ییل‌دن بویان قورال‌لی طالب‌لرنینگ نظارتی‌ده بولگن و اوشبو تومن‌دن قورال‌لی طالب‌لر 9 جنوبی ولایت‌نی هدف آلیب بیله‌دی.
ایتیلیشیچه، ینگی‌لیک‌ده قورال‌لی طالب‌لر غزنی ولایتی‌نینگ ناوه تومنی‌دن باشقه اندر و خوگیانی تومن‌لریده هم جایلشگن.
عین حالده، غزنی یشاوچی‌لریدن کوپینچه‌سی کوکلم موسومی‌ده امنیتی تهدیدلر میزانی آشیشی توغری‌سیده خواطر بیلدیریب ایتیشیچه، داعش و قورال‌لی طالب‌لر ولایت‌نی ایریم منطقه‌لریده جای آلگن، بیراق کورینیشیچه، دولت حاضرگه‌قدر امنیت مستحکم‌لنیشی و خلق‌گه روحیه بیریش اوچون هیچ بیر چاره تدبیر کورمه‌گن.
