افغانستان برقرارلیگینی سقلاوچی کینگش بوگون موجودلیگینی اعلان قیلدی. بو کینگش قطار جهاد رهبرلری و مذهبی متنفذ سیمالردن تشکیل بولگن.
مذکور کینگش افغانستان حکومتی‌نینگ اینگ ییریک سیاسی اپوزیسیونی بولگن‌لیگینی بیلدیرگن. افغانستان برقرارلیگینی سقلاوچی کینگش اعضالری عبدالرب رسول سیاف، محمداسماعیل‌خان، یونس قانونی، عبدالهادی ارغندوال، زلمی رسول، صادق مدبر، محمدعمر داوودزی، بسم الله محمدی، عبدالرحیم وردک و عبدالرووف ابراهیمی‌کبی سیاسی سیمالردن عبارت.
بو کینگش موجودلیگینی اعلان قیلیشی اوچون اوتکزیلگن ییغین‌ده نطق سوزله‌گن عبدالرب رسول سیاف، مذکور کینگش مملکت دایمی قالیشی، دینی قدریت‌لرنی مدافعه قلیش و افغانستان ییر بوتونلیگینی حمایت قیلیش اوچون وجودگه کیلگن دیگن. جناب سیاف‌نینگ سوزلریگه کوره، بو کینگش اوچون اعضا بولگن‌لر اهالی خواطرلرینی توشینه‌دی و انه شو سبب نابرقرارلیک، ایش سیزلیک و تیزیم‌نی مدافعه قیلیش‌دن بولک فعالیتی قیلمدی.
شونینگ‌دیک افغانستان حکومتی بیلن قوراللی طالب‌لر ارا تینچ‌لیک مذاکره بار‌ه‌سیده اشاره قیلگن جناب سیاف اوروش کفر بیلن اسلام اورته‌سیده دوام ایتمه‌یپتی و انه شو اوچون هم مملکت‌ده اوروش‌گه پایان بیریش اوچون دولت‌نی حمایت قیلیش ضرور دیگن.
شوکبی سابق جمهور رییس‌نینگ بیرینچی اورین باسری محمد یونس قانونی بو کینگش حکومت‌گه ضد ایمس بلکه حکومت‌نی برقرارلیک‌که یونلتیریش اوچون فعالیت قیله‌دی دیگن. جناب قانونی مذکور کینگش نینگ ایستک‌لریدن بیری برچه بولیم‌لر جمله‌دن سیلاولرگه اصلاحات کیریتیش.
ییغین جهاد رهبرلری ملی بیرلیک حکومتی رهبرلریدن اول ده بیرگن وعده‌لریگه عمل قیلیب سیلاولرگه اصلاحات کیریتیش و اساسی قانون اوچون لویه جرگه اوتکزیب اهالی‌نینگ تشویش و خواطریگه پایان بیریشلرینی سوره‌گن‌لر.
افغانستان برقرارلیگینی سقلاوچی کینگش اعضالریگه کوره، کینگش‌نینگ اختیاریده بولگن لایحه‌لر وقتینچه‌لیک ایمس و بو کینگش ایسه کیله‌جک تیزیمی اوچون اوزاق مدتلی برنامه‌گه ایگه. شونینگ‌دیک مذکور کینگش کیلگوسی سیلاولرده معین بیر نامزدنی تانیشتیریش کوتیله‌دی.
