نورستان ولایتینینگ نورگرام تومنی اوقوتووچیلرینینگ ایتیشیچه، مذکور ولایتده خزانهدارلیک رسمیلری، اولرنینگ آیلیک حقوقلرینی تولمهگن و اوشبو پوللر بیلن تجارت قیلهدیلر.
اوشبو اوقوتووچیلرنینگ سانی 183 کیشی بولیب، بیش آیدن بویان حقوقلرینی قولگه کیریتمهگنینی ایتگن. اولرنینگ آگاهلنتیریشیچه، بو وضعیت دوام تارتگن صورتده، درسگه حاضر بولمهیدیلر.
نورگرام تومنی اوقوتووچیلریگه کوره، آیلیکلری یالغیز بیش مینگ افغانی و بو پول بیلن قتیقلیکده حیات کیچیرهدی. اولرنینگ ایتیشیچه، هر آی باشیده حقوقلرینی قولگه کیریتیش اورنیده، حکومت رسمیلری تامانیدن آیلیکلری اوغیرلنگنی خصوصیده خبر ایشیتهدی.
بیراق، مذکور ولایت معارف باشلیغی داکتر غلام حسین، بو ادعالرنی رد ایتیب ایتیشیچه، اوشبو اوقوتووچیلرنینگ حقوقلری کم قیلینمسدن هر آی باشیده قیسقه مدتدن کیین، تولنهدی. اونینگ ایتیشیچه، مذکور اوقوتووچیلرنینگ آیلیکلری رسمیلر تامانیدن اوغیرلنگنی توغریسیده حجت ارایه ایتیلگن صورتده، بو واقعه تکرارلنیشینی باشقرهدی.
نورستان ولایتی معارف ریاستینینگ باشلیغی، اوقوتووچیلرنینگ آیلیگی تیزلیکده تولنمهگن دلیلینی، مذکور ولایت ایریم منطقهسیده امنیتی وضعیت یخشی ایمسلیگی دییدی. بیراق، اوقوتووچیلرنینگ ایتیشیچه، بو قیینچیلیک یکونلنیشی خصوصیده، اولرنینگ آیلیگی بانکلر تامانیدن تولنیشی کیرهک.
بو بیرینچی مرته ایمس کیم، نورستان اوقوتووچیلرینینگ آیلیکلری رسمیلر تامانیدن اوغیرلنگنی خصوصیده سیس چیقاریلهدی. شونینگدیک انچه پیت آلدین، مذکور ولایت دوآب تومنی اوقوتووچیلری آیلیکلری حکومت رسمیلری تامانیدن اوغیرلنگنینی ایتگن ایدی.
