افغانستان ایچکریسیده اسلامی کوزقره شدهگی حزب التحریر فعالیتی طالبلر حاکمیتی قوله تیلگنیدن سونگ 2003 ییلده فعالیتگه باشلهگن. مذکور حرکتنی اساساً یاشلرنی اوز صفلریگه جلب ایتیش اوچون کوپراق مکتبلر همده عالی اوقوو یورتلریده نفوذ قیلگنی ایتیلهدی.
افغانستان حکومتینینگ بلند مرتبهلی رسمیلری یقینده حزب التحریر فعالیتی کون سایین آشیب باره یاتگنی بارهسیده تشویش بیلدیرگن ایدیلر. ملی بیرلیک حکومتینینگ اجراییه ادارهسی باشلیغی داکتر عبدالله عبدالله قوس آیینینگ ایکینچی کونی وزیرلر کینگشی مجلسیده سوزلهگن نطقیده اوشبو حرکت فعالیتی میزانی آشگنی بارهسیده خواطر بیلدیردی. او، حزب التحریرنی ترورچی گروهلرنینگ نا حربی قناتی بولگنینی ادعا قیلیب، اوشبو حرکت فعاللرینی مملکت مکتبلری همده بیلیم یورتلریگه نفوذ قیلگنینی تیلگه آلدی.
داکتر عبدالله عبدالله نینگ معلوم قیلیشیچه، افغانستاننینگ امنیتی ارگانلری بوکونگهچه حزب التحریر فعالیتینی یقیندن کوزهتیب بارگنلر، اما اوشبو نا قانونی سیاسی حرکت فعالیتینینگ آلدینی آلیشده عملی چارهلر کورمهگنلر. او دولت نینگ تیگیشلی ادارهلریدن حزب التحریر فعالیتینی توختهتیش اوچون عملی قدملر تشلشینی سورهدی. حزب التحریرنی یاشلر اینیقسه اوقووچیلر همده محصللر آرهسیده کینگ پیمانهده نفوذ قیلگنی ایتیلهدی.
حتا حزب التحریر فعاللرینی بیر گینه کابل بیلیم یورتیدن قطار یاشلرنی سوریه اوروشیگه جونتیش لیککه مؤفق بولگن لیکلری بارهسیده هم ادعا لر موجود. حزب التحریر ترغیب ایتیشی نتیجهسیده سوریهنینگ اوروش جبههلریگه بارگن اوشبو یاشلرنینگ کته قسمی هلاک ایتلگن. مذکور یاشلرنینگ کوپچیلیگینی افغانستان شمال ولایتلری اهالیسی فرزندلری بولگنی ایتیلهدی. افغانستان بویلب بوکونگهچه نا قانونی روشده اوز فعالیتلریگه دوام ایتدیرگن حزب التحریرنی افغانستاننی چیت ایللیک کوچلر تامانیدن اشغال ایتیلگنینی ایتهدی.
اشدی کوز قرهشدهگی اوشبو حرکت یاشلرنی مدنی فعالیتلرنی عملگه آشیریش بهانهسیده اوز صفلریگه جلب ایتیب اولرنینگ ذهنیتلرینی بوزه باشلهگن. حزب التحریرنی داعش بیراغینی کوتریب "اسلامی دولت"دن حمایت ایتگنی هم ایتیلهدی. بیر جهتدن آلیب قره لگنده حزب التحریر ترورچی گروهلر اوچون یاشلرنی آولهماقده. در واقع یاشلرنینگ ذهنینی اشدی گرچیلیک مفکورهلری بیلن تولدیریب، ترورچی گروهلر صفلرینی کوچهیتیریب بارهدی.
مذکور حرکت افغانستان خوفسیزلیگینی بوزیش اوچون ترورچی گروهلر گه نسبتن یامان راق رول اوینه ماقده. دولت رسمیلری افغانستان بویلب حزب التحریر فعالیتینینگ مملکت خوفسیزلیگینی برهم اوریشده نه قدر سلبی تاثیر اوتکزیشینی اوته کیچ پهیقب آلگنلر. حکومتنینگ تیگیشلی ادارهلرینی بو توغریده بوندن بیر نیچه ییل آلدین دقت اعتبار قرهتیب عمل قیلیشلری ضرور ایدی. دولت خوفسیزلیک ارگانلرینی حزب التحریر همده جمعیت اصلاح کبی نا قانونی تشکیلاتلر فعالیتینی توختهتیش اوچون جدی چاره تدبیرلر کوریشی کیره ک.
عکس حالده مذکور تشکیلاتلرنی یاشلر آرهسیده نفوذی آشیب بیر نیچه ییلدن سونگ دموکراتیک تیزیمنی یوق قیلیش خوفی موجود. حزب التحریر، مرکزی آسیا مملکتلریده هم بوندن انچه آلدین اوز فعالیتیگه باشلهگن. اولرنینگ ایریم اعضالری قوشنی اوزبیکستان، تاجکستان همده قیرغیزستانده قولگه آلینیب محکمه ایتیلگن. رسمی کابل ترورچیلیککه قرشی کورهش چارچوبهسیده مرکزی آسیا دولتلری بیلن حزب التحریرنی یوق قیلیش اوچون فعال همکارلیک باشلشی ضرور.
افغانستان نینگ دموکراتیک تیزیمگه طرفدار سیاسی حزبلرینی هم حزب التحریر کبی اشدی کوز قرهشدهگی گروهلر فعالیتی خطرینی انگلهگن حالده بو قبیل ترورچی گروهلر فعالیتینینگ آلدینی آلیش اوچون دولت بیلن همکارلیک قیلیشلریگه کته احتیاج سیزیلهدی. در حقیقت مذکور حزبلرنینگ سیاسی فعالیتلری ضعیف لشگنی باعث حزب التحریر کبی قوپارووچی حرکت کوتیلمهگن درجهده مملکت مکتبلری همده عالی اوقوو یورتلریگه نفوذ قیله باشلهگن.
بیر ایکی آغیز سوز حزب التحریر توغریسیده
حزب التحریر اسلام دنیاسیده خلیفهلیک تیزیمینی جاری ایتیشنی اوزیگه مقصد قیلیب آلگن. مذکور تشکیلات 1953 – ییلی فلسطینلیک روحانی شیخ تقیالدین النبهانی تامانیدن تاسیس ایتیلگن. اوشبو حرکت فعاللری حزب التحریرنی دنیا نینگ 45 مملکتیده فعالیت آلیب باره یاتگنینی ادعا قیله دیلر. بعضیلر ایسه حزب التحریرنی فلسطین جهادی تاثیرینی کمهیتیریش اوچون اسرائیل تامانیدن ایشلب چیقریلگن پروژه بولگنینی ایته دیلر. مذکور حرکت عرب مملکتلریده جانلنه آلمهگن. حزب التحریرچیلر بیر قطار مسلمان دولتلر جملهدن تورکیه و ایرانده قانونی روشده فعالیت آلیب باریش حقوقیگه ایگه ایمسلر.
اما مذکور حرکت فعالیتی ایریم غرب دولتلری اینیقسه امریکا و بریتانیا همده اندونیزیا ده منع ایتیلمهگن. حزب التحریرچیلر دموکراسینی الداودن بولک نرسه بولمهگنینی ایته دیلر. حزب التحریر 1990 ییلدن سونگ امریکاده اوز فعالیتی میزانینی آشیرگن. 2009 ییلی مذکور حرکت اوزینینگ اولکن کنفرانسینی امریکاده اوتکزگن ایدی. ایکینچی کنفرانسی هم اوشه امریکانینگ شیکاگو شهریده اویوشتیریلگن ایدی.
ایریم تحلیلچیلر حزب التحریرنی طالبان کبی غربنینگ باشقه بیر پروژهسی ایکنینی تخمین قیلماقدهلر و بوکونگهچه افغانستانده هم مذکور تشکیلات فعالیتی منع ایتلمهگنیگه حزب التحریرنی غرب بیلن علاقه دارلیگی سبب ایکنینی سبب قیلیب کورستهدیلر. بوکونگهچه حزب التحریرنینگ اصل مرکزی قهییردهلیگی همده اوشبو حرکت رهبری نینگ کیم لیگی معلوم ایمس.
