ترکمنستاندهگی افغان اوقووچیلرینینگ ایتیشیچه، افغانستان دولتی اینیقسه عالی اوقوو وزیرلیگی، اولرنی ایسدن چیقارگن و شونینگدیک، اعتراضلری خصوصیده، بی فرق یاندهشگن. اوشبو اوقووچیلرنینگ ایتیشیچه، بیر ییلدن بویان قانونی حقوقی و امتیازلریدن محروم قالگن، دولت اولردن اوقووچیلیک حقوقینی هم آلنگن.
ناراضیلیک بیلدیرگن اوقووچیلر رقمی 70 کیشیگه ییتیشهدی، اولر ادبیات، انجنیرلیک، ایکینچیلیک و اورگهتیش و تربیهلش بولیملریگه درس اوقیدی. اولر بیر شکایت نامه ترقهتیب ایتیشیچه، ساووق موسومده اوقووچیلیک حقوقلری تولنمهگن صورتده، ترکمنستاندهگی اوقووچیلرنینگ باردی و کیلدی وضعیتی یمان بولیشی ممکن.
اوقووچیلر نمایندهسی طلبالدین غیاثینینگ سلاموطندارگه ایتیشیچه، حقوقلری و ساغلیک بیمهلری توغریسیدهگی قیینچیلیکلرینی عشق آباد دهگی افغانستان ایلچیخانهسی و ماری شهریدهگی جنرال قنسول رسمیلری بیلن شریک قیلگنلر، بیراق اولر اوقووچیلرگه یاردم بیریش اورنیده، یالغیز اولرگه همدرلیک کورستگن. جناب غیاثیگه کوره، ایلچی و جنرال قنسولنینگ اوقووچیلرگه ایتیشیچه، اولر نیچه مرته اوقووچیلرنینگ قیینچیلیگینی افغانستان دولتیگه گزارش بیرگن، بیراق برچه سعی و حرکتلری نتیجهسیز قالگن.
اعتراضچی اوقووچیلردن باشقه بیری مسعود احمدینینگ ایتیشیچه، افغانستان حکومتی اولتیریشلر و ایری ییغینلریده میلیونلرچه افغانی خرچ قیلهدی؛ بیراق اوقووچیلرنینگ کم حقوقینی توللشگه عاجز و کوچسیز بولیب قالهدی. بو مسئله خصوصیده، حکومت بهانه قیدیریب و اوقووچیلرنینگ حقوقینی تولمهیدی.
تشقی ایشلر و عالی اوقوو وزیرلیگینینگ لایحهسی اساسیده، دولت مسؤول دیرکیم، دولتی بورسیهلر آرقهلی مملکتدن تشقری یوباریلگن اوقووچیلرگه، هر آیده بیر مقدار امتیاز بیرهدی. ایتیلیشیچه، ترکمنستانده هر بیر افغان اوقووچیسینینگ حقوقی 60 دالر بولهدی.
عالی اوقوو وزیرلیگی رسمیلرینینگ ایتیشیچه، ترکمنستاندهگی افغان اوقووچیلری خصوصیده بولگن برچه مسؤولیتلرینی عملگه آشیرگن و بو مسئله مملکت تشقی ایشلر وزیرلیگیگه تیگیشلی بولهدی.
عالی اوقوو وزیرلیگی نشرات بولیمی اورین باسری اختر محمد عبیرنینگ سلاموطندارگه ایتیشیچه، افغانستان اوقووچیلرینینگ وضعیتی و حقوقی مسئلهسینی، 286- مکتوب آرقهلی 1394-4-31 تاریخیده تشقی ایشلر وزیرلیگیگه یوبارگن و عالی اوقوو وزیرلیگی باشقه بو توغریده مسؤول ایمس دیر. جناب عبیرنینگ کوپهیتیریشیچه، تشقی ایشلر وزیرلیگی، 14 مملکتدهگی افغان اوقووچیلرینینگ آیلیکلری خصوصیده، رویخط تیارلب و سالیق وزیرلیگیگه یوباریشی کیرهک. دیمک اوقووچیلرنینگ مالی حقوقیگه تینگلش مسئلهسی تشقی ایشلر وزیرلیگیگه تیگیشلی بولهدی و عالی اوقوو وزیرلیگی یالغیز تشقریده بولگن کیشیلرنینگ اوقووچیلیگینی تصدیقلیدی.
عین حالده، تشقی ایشلر وزیرلیگی سوزلاوچیسی شکیب مستغنینینگ ایتیشیچه، افغانستان تشقی ایشلر وزیرلیگی، قنسولی و سیاسی نمایندهلیکلری، اوقووچیلرنینگ قیینچیلیگیگه تینگلهشی لازم. جناب مستغنینینگ ایتیشیچه، ترکمنستان و باشقه دنیا مملکتلریدهگی اوقووچیلرنینگ حقوقی تیزلیکده تولنمسلیگی، تشقی ایشلر وزیرلیگینینگ بی فرق یاندهشیشی ایمس؛ تشقی ایشلر وزیرلیگی یالغیز قولیلیک یرهتهدی. اوقووچیلرنینگ آیلیگی خصوصیده بولگن قیینچیلیک، عالی اوقوو وزیرلیگینینگ بودجهسی تامانیدن، اوقووچیلیک امتیازی و حقوقی ایلگریدن تعیین ایتیلگن چاغیده حل ایتیلهدی.
بونگه قوشیمچه، ترکمنستاندهگی افغان اوقووچیلرینینگ آگاهلنتیریشیچه، اولرنینگ بیر ییلیک حقوقی تولنمهگن توغریسیده بی فرق یاندهشیلگن صورتده، اولر درسدن وازکیچیب و آچلیک اعلان قیلهدی و برچه ایستکلریگه ایجابی بیریلگینچه ناراضیلیکلریگه دوام بیرهدی.
