مرکزی بانک رسمیلرینینگ ایتیشیچه، امیریکه دالرینینگ نرخی یالغیز افغانی پول برابریده کوپیمهگن، بلکیم روسیه، استرالیا و ترکیه دیک مملکتلرده هم کوپیگن. افغانستان مرکزی بانک باشلیغی خلیل صدیقگه کوره، جاری ییل دالر نرخی افغانی پول برابریده کمیده 15 فایز کوپیگن؛ عین حالده، دالر نرخی روسیه روبلی برابریده 44 فایز، استرالیا دالری برابریده 22 فایز و ترکی لیره برابریده 27 فایز کوپیگن.
مرکزی بانک باشلیغی، افغانی پول بهاسی دالر برابریده کمهییش دلیلینی ناتو کوچلرینینگ چیقگنی، مملکتدهگی اوروش دوامی، ایشسیزلیک میزانی کوپهیگنی و ملی ناخالص ایشلب چیقاریشلر کملیگی دیب بیلهدی. جناب صدیق، شونینگدیک نرخ بازاریده بیر قطار کیشیلرنینگ شایعهسی افغانی پول برابریده دالر بهاسی کوپهییش دلیللریدن بیری دیب بیلهدی. او، مملکت بازارچیلری و سوداگرلریدن شایعهلرگه الدهنمهی و مرکزی بانک لایحهلری اساسیده، عمل قیلیشلرینی سورهدی.
جناب صدیقنینگ ایتیشیچه، افغانستان مرکزی بانکی بازارلرده پول نرخینی کوزهتیش خصوصیده، بیللی لایحهلرنی قولگه آلگن و نرخ سیستمهسی بیردیک باشقریلگن. دالر بهاسی بازاردهگی باشقه تَورلردیک، ایستک و عرضه قیلیش اساسیده، تعیین ایتیلهدی و هر زمان مرکزی بانک، موجود نرخ بازارده سوداگرلیککه زیان ییتکیزیشینی حس قیلگن صورتده، بو ریاست نیاز بولگن پولنی نرخ بازاریده کوپهیتیرهدی. اونینگ کوپهیتیریشیچه، شونینگدیک خلق ارا پول صندوقی اوتکن هفته افغانستان مالی و پولی لایحهسینی تیکشیرگن، افغانستان حاضرگی وضعیتیگه قرهگنده اونی مناسب دیگن.
حاضر کابل شهزارده سراییده بیر امیریکه دالری 66 افغانی و 30 پول ساتیب آلینهدی و 66 افغانی و 35 پول ساتیلهدی. ایتیش لازم، مرکزی بانک هر بیر هفته جریانیده، امیریکه دالری برابریده افغانی پول نرخینی باشقریش اوچون نرخ بازاریده نیچه میلیون دالر کوپهیتیرهدی.
