مونوگراف اوقووچی درسنی بیتیریب اوقیش و تحصیل دوری محصولی بولمیش یوتوق صفتیده یازه دیگن حجتنی اخیرده فاکولتهگه تکلیف قیله دیگن تدقیقدن عبارت. بیراق مونوگرف یازیش بیزنینگ مملکتده کیشیلیک سعی و حرکتدن چیقیب و بیر قطار شخصلر اوچون کسب و درآمد قولگه کیریتیش اوچون اصلی بیر منبعگه ایلنگن.
بیلیم یورتنی بیتیرگن محصل تیگیشلی استاد دن بار – بار تحقیق بولیب یازیلگن موضوعنی آلیب، اوشبو موضوع اساسیده تیارلنگن مونوگرافنی آسانلیک بیلن بازاردن قولگه کیریته آلهدی. اوقووچینینگ مونوگرافی (تیزیسی) بازاردن تاپیلمهگن صورتده، بیلیم یورت یقینیدهگی فوتوگرافلر و کتاب ساتووچیلرگه باش اوریب باسمه خانهلرده موجود بولگن تورلی عنوانلی تیارلنگن موضوعلردن تیزلیکده چاپ ایتیریب تحصیلی حجت قولگه کیریتیشگه موفق بولهدی لر.
قیزیغی شونده که اوشبو اوقووچی مونوگرافنی ساتیب آلگن کیین، تیزیسینی تیکشیرووچی کمیته و تیگیشلی استادگه تکلیف قیلهدی، هیچ بیر توسیققه روپه ره بولمسدن و هیچ بیر استاد اونینگ یازگن مونوگرافی خصوصیده شبهه لنمی نهایتده یوقاری امتیاز آلیب اوقیش شَریدن قوتیلهدی.
مونوگراف ساته دیگن و بو خصوصده ساخته ایشلرنی قیله دیگنلر توغریسیده انیق رقمنی تیلگه آلمهگن ابنسینا بیلیم یورت استادلریدن بیری دوکتور امیری، بیلیم یورتنی بیتیرگن سوادسیز محصللر مملکتده مونوگراف یازیش بازارینی قیزیق قیلگنلر دیدی. جناب امیری اوقیش تیزیمیدهگی موجود فساد، مملکت بویلب مالی و اداری فساد بیلن اوشبو مسالهنی علاقهسی بارلیگینی رد قیلمی ایتیشیچه، مملکتده اداری سیستم بوتونلی فسادگه باتگن حالده، اوقیش و تربیهلش عالی درگاهلرده فساد موجودلیگی دولت نظریدن هم طبیعی بیر حال کورینهدی.
مونوگراف یازووچیلردن بیری حکمتالله حکمتی. او، سلاموطندار بیلن اوتکزگن صحبتده، تیزیس یازیش اوچون دولتی و خصوصی بیلیم یورتلر محصللرینینگ ایستکلری بیر ساندهلیگینی ایتیب، تحصیل جریانیده محنت قیلیب تدقیقات بارهسیده هیچ نرسه اورگنمهگن اوقووچی اوچون تیزیس یازیش قوللریدن کیلمی، ناچار مونوگراف یازیش اوچون باشقهلرگه مراجعه قیلهدیلر دیگن. جناب حکمتینینگ ایتیشیچه، افغانستان عالی تحصیلات وزیرلیگی واستادلر هیچ بیر زمان محصللر سویهسینی نظرده توتمسدن تورلی فاکولتهلردن فارغ بیرهدیلر. لیکن محصللر ایسه تورت ییل درس اوقیش بیلن مونوگراف یازیش قابلیتیگه ایگه بولمی کیین تزیس یازووچیلرگه باش اوریب مونوگراف یازدیریب آلهدیلر.
شونینگدیک پایتختلیک مونوگراف یازووچیلریدن بیری جناب عادل زادهنینگ ایتیشیچه، اوقووچیلر تیزیس یازیش اوچون وقتلری بولمهگنلیکنی ییریک بهانه قیلیب کورستهدیلر. بیراق اصلی مساله بوکیم اوقووچیلرنی کوپینچهسی تحصیل دوامیده هیچ نرسه اورگنمهگن و حتی اکادمیک و علمی صورتده ایکی سطر یازیش گه هم قادر ایمسلر.
ایتیلیشیچه، بیر مونوگراف اورتهچه 300 دن 800 دالرگه تمام بولهدی. تیزیس یازووچیلر مونوگرافلر قیمتی موضوع، تحقیق و قنچه وقت صرفلهنیشیگه تیگیشلی ایکن لیگینی ایتهدیلر.
بیلیم یورت استادلری و اوقووچیلردن بیرقطارینینگ ایتیشیچه، اوقیش تیزیمی ایسکیرگنی، اوقووچیلرنینگ علاقهسیزلیگی، تحصیلی و اوقیش ادارهلرده کینگ کولمده فساد موجودلیگی تحصیلی پایان نامه یازیش اوچون ساخته کارلیکنینگ اساسی عاملی سنلهدی دیگنلر.
خصوصی بیلیم یورتلر استادلریدن بیر قطاری، اوشبو قیینچیلیکنی حل ایتیشنینگ بیرینچی یولی هر محصل اوزیگه کوره موضوع تنلهشی و دفاع قیلیشی حتمی لیگی بارهسیده تاکیدله گنلر. شونینگدیک اوقووچیلرنینگ ایتیشیچه، اساسی قانونگه موافق پول برابریده ساخته کارلیککه قول اوریب و ساخته مونوگرافنی قبول ایته دیگن استادلر آلدی آلینیشی لازم.
