افغانستان سرمایه یاتقزووچیلریدن حمایه ایتووچی اداره (آیسا) باشلیغی قربان حقجو، مملکت‌ده سرمایه یاتقزیش میزانی 26 فایز کمه‌یگنی‌دن خبر بیره‌دی. جناب حقجوگه کوره، اوتکن ییل 9 آی باشیده مملکت بویلب 611 میلیون دالر سرمایه یاتقزیلگن ایکن و بو رقم جاری ییل 448 میلیون دالرگه کمه‌یگن.
آیسا اداره‌سی باشلیغی، (شنبه کون) کابل‌ده اوتکزیلگن خبری ییغینده سوزگه چیقیب ایتیشیچه، اوتکن ییل بنا قوریش بولیمی‌ده 200 میلیون دالر سرمایه یاتقزیلگن، بیراق میلادی 2015- ییل، اوشبو بولیمده 83.5 میلیون دالر سرمایه یاتقزیلگن. شونینگ‌دیک صنعت بولیمی‌ده 108 میلیون دالر سرمایه یاتقزیلگن ایکن و جاری ییل 81 میلیون دالرگه ییتیشگن.
انه شونده‌ی اوتکن ییل، ایکینچیلیک بولیمی‌ده 17 میلیون دالر صرف لنگن و بو رقم جاری ییل‌ده 14 میلیون دالرگه ییتیشگن. مخابراتی خذمت‌لرگه اوتکن ییل 220 میلیون دالر سرمایه یاتقزیلگن ایکن و بو ییل 199 میلیون دالرگه کمه‌یگن.
عین حالده، آیسا اداره‌سی گزارشی اساسیده، کانلر بولیمی‌ده سرمایه یاتقزیش میزانی کوپه‌یگن. اوتکن ییل اوشبو بولیمده 65 میلیون دالر سرمایه یاتقزیلگن ایکن و جاری ییل بو رقم 69 میلیون دالرگه ییتیشگن، اوتکن ییل‌گه قره‌گنده 6.5 فایز کوپه‌یگنینی کورسته‌دی.
آیسا اداره‌سی باشلیغی، مملکت‌ده سرمایه یاتقزیش میزانی کمه‌ییش دلیلی‌نی، سیاسی ثبات‌سیزلیک، ناتو کوچلری‌نینگ چیقگنی، ناتینچ‌لیک‌لر کوپه‌یگنی، پول کم‌لیگی، آست قوریش لایحه‌لر تطبیق ایتیلمس‌لیگی، اداری فساد و ییترلی انشاعات بولمه‌گنی دیب بیله‌دی.
جناب حقجوگه کوره، سرمایه یاتقزووچیلر اورته‌سیده، امیریکه 434 میلیون دالر بیلن بیرینچی درجه‌ده، ترکیه و کانادا تیزیم شکل‌ده 238 میلیون دالر و 178 میلیون دالر سرمایه یاتقزیب ایکینچی و اوچینچی درجه‌ده قرار تاپه‌دی. اونگه کوره، سرمایه یاتقزیلگن بوتون 10 میلیارد دالر جمله‌سیدن 18 فایزی تشقی سرمایه یاتقزووچیلر و 82 فایزی ایچکی سرمایه یاتقزووچیلر بولگن.
آیسا اداره‌سی باشلیغی‌گه کوره، اوتکن ییل یالغیز کابل‌ده ایری بولیم‌لرگه 249 میلیون دالر سرمایه یاتقزیلگن و بو رقم جاری ییل 9 آی باشیده 269 میلیون دالرگه ییتیشگن، بیراق سرمایه یاتقزیش میرانی ننگرهار، هرات، قندوز، قندهار و خوست ولایت‌لریده جاری ییل‌ده جدی صورتده کمه‌یگن.
