جمهور رییس محمداشرف‌غنی افغانستان حکومتی‌نینگ سوز ایرکین لیگی‌گه ایشانچی کامل، اما عاموی اخبارات واسطه‌لری خبرنی قاپلش‌ده ملی منفعتنی نظرده توتیش لازم دیگن.
شونینگدیک جمهور رییس‌نینگ سوزلریگه کوره، قندوز شهری سقوط قیلیش عامل‌لری همده وظیفه‌لریگه اعتبار بیرمه‌گنلر تانیلگندن سونگ جزالنه‌دیلر.
جمهور رییسلیک سراییدن نشر ایتیلگن خبرنامه‌ده کیلیشیچه، جمهور رییسلیک سرایی تیزلیک‌ده قندوز ولایتی حادثه‌سی تیکشیریلیشی اوچون مذکور ولایت‌گه هیأت یوباره‌دی.
خبرنامه‌نی جمهور رییس‌گه اساسلب یازیشیچه، « قندوز شهرینی قیته‌دن آلیش اوچون اوزیدن شجاعت کورستگن امنیتی و دفاعی منصبدارلری قوشیمچه مسووللری تقدیر بوله‌دیلر».
شونینگدیک جمهور رییس قندوز عملیاتی اهالی جانی سقله‌نیشی اوچون کیچراق باشلنگن‌لیگینی ایتگن.
قندوز شهری بوندن تورت کون آلدین قورال‌لی طالبلر تصرفیگه اوتدی. حکومت رسمیلری بوگون (پنجشنبه) ولایت‌نینگ اداره‌لرینی قیته‌دن قولگه آلگن‌لر.
باشقه تاماندن نماینده‌لر مجلسی‌نینگ رییسی عبدالرووف ابراهیمی، شمال ولایت‌لری قورال‌لی طالبلردن تازه‌لنگونگه قدر عملیات دوام ایتیشی باره‌سیده تاکیدله‌گن
جناب ابراهیمی بوگون کابل‌ده بیر خبری انجمن‌ده شمال عملیاتی‌نی جمهور رییس درست مدیریت قیلیشی کیره‌ک دیگن.
شونینگدیک ابراهیمی، نماینده‌لر مجلسی هم قندوز ولایتی سقوط حادثه‌سی تیکشیریلیشی اوچون هیأت تعین قیلگن و مذکور هیأت قندوز ولایتی قنده‌ی سقوط قیلگن‌لیگیدن تشقری اوشبو تورت کون ایچیده اهالی‌گه ییتگن ضررنی هم تیکشیره‌دی دیگن.
ابراهیمی ملی بیرلیک حکومت رهبرلریده قندوز ولایتی قورال‌لی طالبلر نظارتی‌گه اوتیش اوچون قولی بولگن محلی رسمیلر وظیفه‌دن آلینیب عدلی و قضایی اداره‌لرگه تانیشتیریشی باره‌سیده علیحده تاکیدله‌گن.
مجلس رییسی‌گه کوره، اوروشده زیان کورگن قندوز خلقی جدی همکارلیککه احتیاجی بار و دولت ایسه تیزلیک‌ده اهالی قیین‌چیلیگی بر طرف ایتیلیشی اوچون سعی وحرکت قیلیشی لازم.
عین حالده، افغانستان پارلمان رییسی مملکت مهاجرلر وزیرلیگیدن آواره بولگن‌لرگه انسان پرورلیک یاردم ییتکزیب بیریشنی طلب قیلگن.
ایتیلیشیچه، مذکور شهرده یوز بیرگن اوروشده یوزلب عایله آواره بولگن.
