جمهور رییس بیرینچی اورین باسری جنرال عبدالرشید دوستمنینگ جانیگه قصد قیلگن اوچ خودکش هجومچی، جنرال دوستمنینگ خاص قوروقچیلری تامانیدن توتقونگه آلیندی. افغانستان یاشلر جنبشی تشکیلاتی باشلیغی و ملی اسلامی جنبش حزبی اورین باسری مسعود احمد مسعودنینگ، میدیاگه ایتیشیچه، خودکش هجومچیلر تورت کیشی ایکن، اولردن بیری بو هجومگه مؤفق بولمهگنیدن کیین، قاچیشگه مؤفق بولگن.
توتقونگه آلینگنلر پاکستانده تعلیم کورگنلرینی بوینیگه آلگن و مذکور مملکت تامانیدن جمهور رییس بیرینچی اورین باسرینینگ اولدیریش اوچون قیصار تومنیگه یوباریلگن.
جنرال دوستم تامانیدن مملکت شمالینی قوراللی طالبلردن تازهلش اوچون یولگه قوییلگن عملیات اوچ هفتهدن بویان دوام ایتماقده. اوشبو عملیات دوامیده، جنرال دوستم حاضرگچه ایکی مرته خطرگه دوچ کیلدی، بیراق بو هجوملر باشقریلدی.
ایتیلیشیچه، حاضرگه قدر جنرال دوستم بو تازهلش عملیاتده مؤفق بولگن و شونینگدیک نیچه کوندن آلدین، مذکور ولایت خواجه گوهر منطقهسیده دولتگه قرشی قوراللی عصیانچیلردن 300 تهسی قوراللرینی ییرگه قوییب تینچلیک لایحهسیگه قوشیلگنلر.
شونینگدیک فاریابده 209 شاهین قول اردو بیرینچی لوا قومندانی جنرال شیرینشاه کوهبندینینگ سلاموطندارگه ایتیشیچه، امنیتی کوچلر بیلن یوزمه یوز اوروشیشگه قادر بولمهگن کمیده 100 جنگری طالب، منطقهدن چیقیب و اوزاق منطقهلرگه تاماندن قاچیب کیتگنلر.
