ننگرهار امنیتی مسووللریگه کوره، بوندن بویان حربی مسالهلر اوچون هیچ کیمگه ارهلهشیشگه رخصت بیریلمیدی. ولایت خوفسیزلیک ادارهسی معاونی اسدالله برچه سیاسی و مدنی ادارهلرگه اوز ایشلریگه اعتبار بیریب حربی ایشلرگه ارهلشمسلیکلرینی سورهگن.
بوگون (دوشنبه) بیر خبری ییغینده سوزلهگن جناب اسدالله حربی ایشلرگه ارهلهشیش مملکت ملی کوچلریگه اعتبار بیرمسلیک دییه تیلگه آلگن. اونگه کوره، ملی کوچلر هر بیر منطقه برقرارلیگی و تینچلیگینی تامین ایتیشگه قادرلر.
شونینگدیک او مذکور ییغینده اوتگن بیر آیده اون اوچ کیشی قولگه آلینگن لیگینی ایتگن. ایتیلیشیچه، اوشبو شخصلر برچهسی حربی ییراقلر بیلن قولگه آلینگن لر. مذکور شخصلر ننگرهار نی نابرقرار قیلیش اوچون ییریک برنامهلری بولگن.
اوشبو ییغینده اشتراک قیلیب سوزلهگن ولایت امنیه قوماندانی فضل احمد شیرزاد کوت ولسواللیگیده اوتکزیلگن حربی تازهلش عملیاتده موفقیتلی اوتکزیلگن دیگن. اونگه کوره، ولسوالیک نینگ توقسن فایزی محل یشاووچیلری همکارلیگی بیلن دولت قوراللی مخالفلریدن تازهلنگن. شیرزادنینگ سوزلریگه کوره، اهالی ملی کوچلرگه همکارلیک قیلیشگه تیار و حاضر بو منطقهلرده امنیت تامین ایتیلگن.
محل امنیتی رسمیلری کوت ولسواللیگی اهالیسی ایستهگی اساسیده بوندن نیچه وقت آلدین 50 نفر محلی پولیس و حاضر ایسه 150 محلی پولیس کوچلری امنیت تامین ایتیلیشی اوچون اوشبو ولسواللیکه یوباریلگن دیگن. شونینگدیک شیرزاد اچین و هسکه مینه ولسواللیکلریده هم تازهلش عملیات اوتکزیلگن لیگیدن خبر بیرگن. مذکور حربی عملیات داعش گروهی نابود ایتیلیشی اوچون اوتکزیلگن.
شیرزادگه کوره، مذکور حربی عملیاتلر جریانیده داعش نینگ 95 نفری اولدیریلگن. ایتیلیشیچه اولرنینگ کوپچیلیگی پاکستانلیکلر دیر. او، ولسواللیکلر امنیتی دایمی سقلهنیب قالیشی اوچون کوپراق سعی و حرکتلر بار دیگن. شونینگدیک ولایت امنیه قوماندانی عاموی اخبارات واسطهلردن هم شایعات خبرلرنی ترقه تیش اوچون حساس بولیشلرینی طلب قیلگن.
بوندن چمهسی ایکی آی آلدین امنیتی کوچلر کوت ولسواللیگی خلقیگه یاردم بیریش اوچون داعش گروهی گه قرشی ییریک عملیات اوتکزگن ایدی نتیجه ده داعشنینگ 59 کیشی سی نابود ایتیلگن ایدی. ایتیلیشیچه، داعش گروهی ولایتنینگ هسکه مینه، کوت و اچین ولسواللیکلریده مکتبلرنی اوقووچیلر یوزیگه یاپگنلر. شونینگدیک اوروشلر جریانیده یوزلب خانه دان اوز اوی جایی نر ترک قیلیشگه مجبور ایتیلگن. عین حالده، ولایت رسمیلری تیزلیکده مذکور تومن بوتونلی طالبلردن تازهلهنیشنی تیلگه آلگنلر.
