بیرلشگن ملتلر تشکیلاتی نینگ عمومی ییغینیده اشتراک قیلگن افغانستان حکومتی نینگ هیأتی پاکستانلیک هیأتنینگ ایکی تامانلمه اوچرهشیش اوچون قیلگن ایستهگینی رد قیلگن. اجراییه ریاسیتینینگ مطبوعات خذمتی مذکور خبرنی تصدیقلهگن.
بوندن نیچه کون آلدین بیرلشگن ملتلر تشکیلاتی نینگ ییتمیش ییللیگینی نشانلش ییغینیده افغانستانلیک هیأت رهبرلیگیده جناب عبدالله عبدالله اشتراک قیلگن ایدی. پاکستانلیک هیأتنینگ ایستهگی اساسیده مذکور ییغین جریانیده پاکستان باش وزیری جناب عبدالله بیلن اوچرهشیب اخیرگی وقتلرده پاکستان و افغانستانده یوز بیرگن حادثهلر اوستیده بحث قیلیشی کوتیلردی.
ملی بیرلیک حکومتیگه یقین ایریم منبعلرنینگ سلاموطندارگه ایتیشیچه، افغانستان حکومتی نینگ مذکور بلند مرتبهلی رسمیلری بوندهی عکس العمل کورسهتیش بیلن انیق روشده پاکستان تامانینی ترورچیلیککه قرشی کورهشیش اوچون صادقانه همکارلیک قیلیشگه اوندیدی.
افغانستان حکومتی کابل نینگ شاه شهید منطقهسیده صادر ایتیلگن هجوم پاکستان استخبارات ادارهسی همده مذکور مملکتده استقامت قیلهدیگن ترورچیلیک آرقهلی عملگه آشیریلگنلیگینی ادعا قیلگن ایدی.
شونینگدیک پاکستان پشاور شهریدهگی حربیلر مرکزیگه قیلینگن هجومگه بو مملکت رسمیلری عکس العمل بیلدیریب افغانستان دولتینی تنقید آستیگه آلیب اوشبو حمله افغانستان توپراغیده پلانلشتیریلگنلیگینی ایتگن ایدی، لیکن مملکت ملی بیرلیک حکومتینینگ رسمیلری اوشبو ادعالرنی رد قیلگنلر.
ملی بیرلیک حکومتی رهبرلریگه یقین شخصلرنینگ سوزلریگه قرهگنده، تورلی مسالهلر اوچون عیبلنگن پاکستان بیرلشکن ملتلر تشکیلاتینینگ ییتمیشینچی ییللیگینی نشانلش ییغینده افغانستان سیماسینی دنیا جماعهچیلیگی آلدیده خدشهدرا قیلیشگه سعی وحرکت قیلهدی.
بیرلشگن ملتلر تشکیلاتینینگ ییتمیشینچی ییغینیده ملی بیرلیک حکومتینینگ اجراییه رییسی جناب عبدالله عبدالله امریکه، آلمان، بریتانیا، کویت، تاجیکستان، ایران، هند، چین و روسیه دولت رسمیلری بیلن ایری – ایری شکلده اوچرهشیب ملاقات قیلیشی کوتیلردی.
حکومت اجراییه ریاسیتی نینگ خبرنامهسیده بیرلشگن ملتلر تشکیلاتینینگ دنیا بولیب اوتکزیلهجک ییغینده جناب عبدالله تورلی مسالهلر جملهدن تینچلیک، مخدر مادهلرگه قرشی کورهشیش و افغانستانده داعش گروهی تاپیلیشی اوستیده بحث قیلیشی انابتگه آلینگن.
بوندن آلدین پاکستان باش وزیری همده ملی خوفسیزلیک مصلحتچیسی سرتاج عزیز افغانستانگه سفر قیلیشی کوتیلردی، اما افغانستان حکومتی هر مرته بو خبرنی قارهلب کیلگن.
